तलब खुवाउन नसकेपछि युएससीआईएसका २० हजारमध्ये साढे १३ हजार कर्मचारीलाई विदा दिइने
प्रकाशित मिति : असार १०, २०७७ बुधबार
अमेरिकामा ग्रिनकार्ड, नागरिकता लगायत सम्पूर्ण आप्रवासन सम्बन्धि काम गर्ने सरकारी निकाय युएससीआईएसका २० हजार कर्मचारीहरुमध्ये झण्डै साढे १३ हजार ४ सय कर्मचारीहरुलाई वेतलवी विदा दिइने भएको छ । तलब खुवाउन बजेटको अभाव भएपछि उनीहरुलाई अगस्त ३ देखि वेतलवी विदा दिन लागिएको हो ।
युएससीआईएसले बजेट माग गर्दै संसदलाई यसबारे जानकारी गराएपनि संसदबाट बजेट भने पारित भएको छैन । युएससीआईएसको आवेदकको शुल्कबाट चल्ने एजेन्सी भएपनि कोरोनाको महामारीका कारण युएससीआईएसमा रकम अभाव भएको छ ।
कोरोनाको महामारीका बेलामा युएससीआईएसले व्यक्ति उपस्थीत हुनुपर्ने सेवा, ग्रिनकार्ड र नागरिकताका अन्तरवार्ताहरु र नागरिकता वितरण समारोहहरु समेत स्थगित गरेको थियो । अगस्त ३ भन्दा अगाडि संसदले अतिरिक्त बजेटको व्यवस्था गरेको खण्डमा भने कर्मचारीहरु निरन्तर काममा खटिनेछन् ।
युएससीआईएसले जुन महिनाको पहिलो साताबाट नागरिकता वितरण समारोह लगायतका सेवाहरु सुचारु गरेको छ । कोरोनाको महामारीका कारण आवेदनहरुमा कमी आएपछि युएससीआईएसले अगस्तदेखि आधाभन्दा धेरै कर्मचारीहरुलाई तलब खुवाउन नसक्ने अवस्था श्रृजना भएको हो ।
यदि आधाभन्दा बढी कर्मचारीहरुलाई विदा दिइएको खण्डमा त्यसको प्रत्यक्ष मार आवेदकहरुलाई पर्नेछ । युएससीआईएसमा आवेदनहरुको चर्को ब्याकलग रहेको अवस्थामा साढे १३ हजार कर्मचारीहरुलाई विदा दिइएमा अमेरिकाको आप्रवासन प्रणाली ठप्पप्राय हुनेछ ।