जुन २५ र २७ मा काठमाडौंबाट दोहाहुँदै अमेरिका आउन सकिने, ९०४ अमेरिकनले छाडे नेपाल
प्रकाशित मिति : असार १०, २०७७ बुधबार
जुन २५ र जुन २७ मा काठमाडौंबाट दोहाहुँदै अमेरिका आउन सकिने भएको छ । कतार एयरवेजले दुईवटा उडानका लागि स्वीकृति पाएकाले ती उडानमार्फत दोहा आउन सकिने र दोहाबाट नियमित उडानबाट अमेरिका आउन सकिनेछ ।
कतार एयरवेजले टिकटका लागि काठमाडौंमा रहेको प्रेसिडेण्ड ट्राभल एण्ड टुर्ससँग सहकार्य गरिरहेको छ । यी उडानमार्फत अमेरिका आउन चाहनेहरुले प्रेसिडेण्ड ट्राभलमा सम्पर्क गरेर टिकटको बन्दोबस्त गर्ने सक्नेछन् ।
लकडाउन अवधि सुरु भएदेखि अहिलेसम्म नेपालबाट ९ सय ४ जना अमेरिकनहरु अमेरिका आइसकेका छन् । उनीहरुमध्ये २ सयभन्दा बढी कतार एयरवेज र टर्किस एयरलाइन्सका दोहा र इस्तानबुलसम्मका चार्टड उडानमा आएर त्यहाँबाट नियमित उडानमार्फत अमेरिका आएका हुन् ।
नेपालमा कोरोनाको महामारीपछि सुरुभएको लकडाउनमा मार्च २७ देखि जुन १४ सम्म चार्टड विमानमार्फत नेपाल छाड्ने विदेशीमा सबैभन्दा धेरै अमेरिकनहरु नै रहेका छन् । यही अवधिमा ९५४ जना नेपालीहरु विदेशबाट नेपाल फर्केका छन् भने ४३९० जना नेपालीहरुले नेपाल छाडेका छन् ।