अमेरिकामा रोजगारमा आधारित ग्रिनकार्डको ब्याकलग ८ लाख, यस्तै रहे कतिपयलाई ५० बर्ष लाग्ने
प्रकाशित मिति : पुस २, २०७६ बुधबार
अमेरिकामा कानुनी रुपमा काम गरिरहेका झण्डै ८ लाखले ग्रिनकार्डको चर्को ब्याकलगको सामना गरिरहेका छन् । रोजगारमा आधारित ग्रिनकार्डको ब्याकलग निकै चर्को भएपछि प्रतिक्षा अवधि पनि बढेको छ ।
रोजगारमा आधारित ग्रिनकार्ड कुरेर बसिरहेकाहरुमा धेरैजसो भारतीय रहेका छन् । वासिंटन पोष्टमा प्रकाशित रिपोर्ट अनुशार कतिपय प्रकारको ग्रिनकार्ड प्राप्त गर्न उनीहरुलाई ५० बर्षसम्म समेत लाग्ने अवस्था श्रृजना भएको जनाइएको छ ।
सन् १९९० देखि बार्षिक कोटामा बृद्धि नगरिएका कारण भारतीयहरुलाई रोजगारमा आधारित ग्रिनकार्डको चर्को ब्याकलगको सामना गर्नुपरेको हो । अमेरिकामा रोजगारमा आधारित ग्रिनकार्ड आवेदकहरुमा भारतीयहरुको संख्या निकै उच्च रहेको छ ।
लुजियाना निवासी योगी छाब्राले आफू २१ बर्षदेखि अमेरिकामा बस्दै आएको र ९ बर्षदेखि ब्याकलगको सामना गर्नुपरेको बताएका छन् । उनका २३ बर्षको जेठा छोरा ३ बर्षको उमेरदेखि अमेरिकामा बस्दै आएका छन् तर दुईबर्ष अगाडि २१ बर्ष काटेकाले उनले बुबामार्फत ग्रिनकार्ड पाउने योग्यता समेत गुमाएका छन् । २० बर्षदेखि अमेरिकामा बस्दै आएका उनले अहिले देशनिकालाको सामना गर्ने अवस्था आएको छ ।
रोजगारमा आधारित ग्रिनकार्ड प्राप्त गर्ने २५ बर्ष लाग्ने र त्यसपछि ग्रिनकार्ड प्राप्त गरेपछि नागरिकता प्राप्त गर्न पाँचबर्ष लाग्ने अवस्था सृजना भएको छ । जसका कारण उनीहरुले कतिपय परिवारका सदस्यलाई ग्रिनकार्ड आवेदन दिंदा १५ देखि २० बर्षसम्म लाग्ने अवस्था भएका कारण यो प्रकृयाबाट परिवारका कैयन सदस्यलाई ग्रिनकार्ड प्राप्त गर्न ५० बर्षसम्म लाग्ने हिसाब गरिएको हो ।