आठ बर्षका बालक जसले गरे ३ हजार भन्दा धेरै होमलेस पूर्वसैनिकलाई सहयोग
प्रकाशित मिति : मंसिर ५, २०७६ बिहीबार
केही अमेरिकी पूर्व सैनिकहरु होमलेस छन् भन्ने कुरा टेलर स्टालिङ्सले ४ बर्षको हुँदा नै थाहा पाए । पूर्वसैनिकहरु मेरिल्याण्ड निवासी यी बालकका विस्तारित परिवारका हिस्सा भएकाले उनले पूर्व सैनिकहरुलाई सधै हिरोकै रुपमा सोंचे ।
जब उनले पूर्व सैनिकहरु होमलेस भएको थाहा पाए, तब उनले ती पूर्वसैनिकका लागि तत्कालै सहयोग गर्न चाहे । उनले आफ्नी आमासँग ती होमलेस सैनिकका लागि घर बनाइदिन सकिन्छ कि भनेर सोधे ।
उनी आफै बालक भएकाले पूर्व सैनिकका लागि घर बनाइदिनसक्ने अवस्थामा भने उनी थिएनन् । त्यसैले उनले वास्तविक रुपमा नै सहयोग गर्न सकिनेगरी केही नयाँ चिजको सुरुवात गरे । उनले त्यसकालागि हिरो ब्याग बनाउन सुरुवात गरे ।
‘मैले आमालाई केही पूर्व सैनिकहरु किन घरबारविहिन छन् भनेर सोध्न थालेपछि हामीले उनीहरुको सहयोगका लागि विशेष गर्न सुरुवात भयो । मैले मेरी आमासँग कुराकानी गरेपछि उनीहरुका लागि म वास्तवमै घर निर्माण गर्न चाहन्थें । तर हामी मिलेर एउटा यथार्थपरक लक्ष्य बनायौं,’ उनले भने ।
यही लक्ष्य अनुरुप उनीहरुले सरसफाई र अन्य व्यक्तिगत गु्रमिंगका लागि चाहिने सामानहरु भरिएको एउटा झोला र धन्यवाद कार्ड होमलेस पूर्व सैनिकहरुलाई दिने योजना बनाए । जसलाई बालकले हिरो ब्यागको नाम दिएका छन् ।
हिरो ब्यागमा टोपी, पञ्जा, लिपगार्ड, स्वेटर, टुथब्रस, टुथपेष्ट, साबुन लगायतका सामाग्रीहरु हुनेछन् । यो जाडोमा होमलेस पूर्वसैनिकहरुलाई प्रदान गरिनेछ । उनीहरुले अहिलेसम्म कैयन पूर्वसैनिकहरुलाई सहयोग गरिसकेका छन् भने विगत पाँच बर्षमा ५० हजार अमेरिकी डलर संकलन गरिसकेका छन् ।
बालकले होमलेस पूर्व सैनिकहरुलाई सहयोग गर्ने संघसंस्थालाई ती हिरो ब्यागहरु उपलब्ध गराएका छन् । कतिपय ठाउँमा त उनी आफैले पनि सिधै होमलेस पूर्व सैनिकहरुलाई भेटेर दिने गरेका छन् । उनका तर्फबाट गोफण्डमीमा सुरु गरिएको अभियानमा अहिलेसम्म ३७ हजार अमेरिकी डलर संकलन भइसकेको छ ।
