अमेरिकाको जर्जियास्थित निजी आइस हिरासत केन्द्रमा दर्जनौँ आप्रवासीहरूद्वारा भोक हड्ताल शुरू
प्रकाशित मिति : २१ आश्विन २०८३, बुधबार
अमेरिकाको जर्जिया राज्यस्थित एउटा निजी अध्यागमन हिरासत केन्द्रमा थुनिएका आप्रवासीहरूको समूहले लामो समयदेखिको हिरासत र अमानवीय अवस्थाको विरोध गर्दै सामूहिक भोक हड्ताल शुरू गरेका छन्।
अधिकारकर्मी र पीडितका परिवारका अनुसार दक्षिण-पूर्वी जर्जियामा रहेको ‘फोकस्टन डी रे जेम्स आइस प्रोसेसिङ सेन्टर’ भित्र कम्तीमा ७३ जना हिरासतमा रहेका आप्रवासीहरू भोक हड्तालमा सहभागी छन्। विगतमा राज्यको कारागार रहेको फोकस्टन सुविधा हाल निजी जेल सञ्चालक कम्पनी ‘जिओ ग्रुप’ले अमेरिकी आइससँगको सम्झौतामा सञ्चालन गर्दै आएको छ।
हड्तालमा उत्रेका केही व्यक्तिहरूले एउटा भिडियो र खुला पत्र सार्वजनिक गर्दै आफ्ना शरणार्थी तथा अध्यागमनसम्बन्धी मुद्दाहरूको किनारा नलागुञ्जेल रिहाइको माग गरेका छन्। त्यसैगरी, फोकस्टनमा थुनिएका दुई रुसी शरणार्थीहरूले एक दस्तावेज जारी गर्दै त्यहाँभित्र गुणस्तरहीन स्वास्थ्य सेवा, कर्मचारीको धम्की, ढुसी परेको खाना र कानुनी प्रक्रियाको अभाव जस्ता गम्भीर अधिकार उल्लङ्घन भइरहेको दाबी गरेका छन्।
“हामीमध्ये धेरैजना आफ्ना परिवारबाट अलग भएका छौँ,” ४५ जना थुनामा रहेका आप्रवासीहरूले हस्ताक्षर गरेको खुला पत्रमा भनिएको छ, “कुनै अपराध नगरीकनै बारभित्र बस्नुपर्दा हामीले बच्चाको जन्म, आफन्तको अन्त्येष्टि र जीवनका अमूल्य वर्षहरू गुमाएका छौँ।”
यो भोक हड्तालमा कुनै एउटा देश वा जातिका मात्र नभई रुस, चीन, सुडान, अफगानिस्तान लगायतका विभिन्न देशबाट आएर शरणार्थीको आवेदन दिएका व्यक्तिहरू सहभागी छन्।
जर्जियास्थित अधिकारकर्मी मोनिका ह्वाटलेका अनुसार भोक हड्तालका प्रमुख आयोजकमध्येका एक रुसी शरणार्थी इद्रिस मखमुदोभलाई यो हप्ता एकान्त कारावासमा राखिएको छ।
हस्ताक्षरकर्ताहरूले आफूहरू १६ महिनादेखि लगभग तीन वर्षसम्म थुनामा परेको तर अहिलेसम्म कुनै अपराधको अभियोग नलगाइएको बताएका छन्। उनीहरूले आफूहरूबाट कुनै खतरा नभएको र भाग्ने सम्भावना पनि नरहेकाले कानुनी प्रक्रिया चलुञ्जेल बाहिरै रहन दिनुपर्ने तर्क गरेका छन्।
हड्तालमा सहभागीहरूमध्ये फोक्सोको क्यान्सरबाट पीडित यमनी शरणार्थी पनि रहेका छन्, जसका सन्तान अमेरिकी नागरिक हुन्।
त्यसैगरी, रुसी नागरिक एलेक्सी कोभाल्को र अलेक्ज्याण्डर बोरोभकोभले त्यहाँका एक स्वास्थ्यकर्मीले “मेरो काम तिमीहरूको उपचार गर्ने होइन, तिमीहरू नमरोस् भन्ने मात्र हो” भनेर जवाफ दिएको आरोप लगाएका छन्। उनीहरूले ढलको समस्या, चुहिने छत, गन्हाउने पानी र कर्मचारीहरूको आप्रवासीप्रतिको विभेदकारी व्यवहारबारे पनि उल्लेख गरेका छन्।
यस विषयमा जिओ ग्रुपले सबै प्रश्नहरू आइसतर्फ पन्छाएको छ भने आइस र होमल्यान्ड सेक्युरिटीले यसबारे कुनै प्रतिक्रिया दिएका छैनन्।
हालैका वर्षहरूमा अमेरिकामा अध्यागमन पक्राउ तीव्र पारिएकाले फोकस्टन जस्ता केन्द्रहरूमा थुनिएका आप्रवासीहरूको सङ्ख्या उल्लेख्य रूपमा बढेको छ। चालु वर्षको तथ्याङ्कअनुसार यस केन्द्रमा मात्रै करिब २,२०० जना मानिसहरू हिरासतमा रहेका छन्। अमेरिकाभरका विभिन्न आइस हिरासत केन्द्रहरूमा यस्ता भोक हड्तालका घटनाहरू पटक-पटक दोहोरिने गरेका छन्।