सुरक्षा खतरा र आक्रमणको योजनापछि बेलायतबाट अमेरिकी बम्बर विमानहरू फिर्ता
प्रकाशित मिति : १८ आश्विन २०८३, आइतबार
Photo: Valentin Karisch/ Unsplash
इरानविरुद्धको हमलामा प्रयोग गरिएको बेलायतस्थित अमेरिकी वायुसेना बेसमा आतङ्ककारी आक्रमणको योजनाबारे अनुसन्धान सुरु भएसँगै अमेरिकाले त्यहाँ तैनाथ आफ्ना बमवर्षक विमानहरू स्वदेश फिर्ता बोलाएको छ।
संवेदनशील सैन्य गतिविधिको विषयमा सार्वजनिक रूपमा बोल्न अधिकार नभएका पेन्टागनका एक अधिकारीले आइतबार नाम नछाप्ने सर्तमा दिएको जानकारीअनुसार ती बम्बरहरूलाई अमेरिकास्थित तिनका मुख्य बेसहरूमै फिर्ता पठाइएको छ।
‘मिलिटरी एयर ट्र्याकिङ अलायन्स’ जस्ता उड्डयन निगरानी समूहहरूले इरान युद्धको सुरुआती दिनदेखि नै फेयरफोर्डबाट दर्जनौँ बी-५२ र बी-१ बम्बरहरू सञ्चालित भएको देखेका थिए। आइतबार मात्रै धेरै बी-१ बम्बरहरूले उक्त बेसबाट उडान भरेको उनीहरूले बताएका छन्।
अमेरिकी राष्ट्रपति डोनाल्ड ट्रम्पले इरानसँगको युद्ध सुरु गर्दा यो अभियान केही हप्ता मात्र चल्ने आश्वासन दिएका थिए। तर, नयाँ हमलाहरू गर्ने वा नगर्ने भन्नेबारे अहिले उनी अन्य विकल्पहरूमाथि विचार गरिरहेका बेला यो कदम चालिएको हो।
शनिबार ओहायोमा आयोजना हुने एउटा र्यालीका लागि ह्वाइट हाउसबाट निस्कने क्रममा ट्रम्पले सञ्चारकर्मीहरूसँग भने, “हामीले इरानका बारेमा केही निर्णयहरू लिनुपर्नेछ। इरान ध्वस्त भइसकेको छ। त्यसैले अब प्रश्न यति मात्र हो-यो काम सजिलो तरिकाले हुन्छ वा गाह्रो तरिकाले।”
गत सेप्टेम्बरको अन्त्यतिर आरएएफ फेयरफोर्ड बेसमा घटेको एउटा सुरक्षा घटनापछि आतङ्ककारी आक्रमणको षड्यन्त्र रचेको आशङ्कामा गत हप्ता मध्य लन्डनबाट बेलायती-इरानी दोहोरो नागरिकता भएका एक व्यक्तिलाई गिरफ्तार गरिएको थियो। यस अनुसन्धानका क्रममा हालसम्म छ जनालाई नियन्त्रणमा लिई पछि धरौटीमा छाडिएको छ।
बेलायती अधिकारीहरूले उक्त घटनाको सम्बन्ध तेहरानसँग जोडिएको बताएका छन् भने इरानले यसमा आफ्नो कुनै संलग्नता नरहेको खण्डन गरेको छ।
लन्डनभन्दा १०० माइल पश्चिममा रहेको आरएएफ फेयरफोर्ड बेसलाई अमेरिकी सेनाले मध्यपूर्वमा भएका दशकौँ लामो द्वन्द्वहरूमा प्रयोग गर्दै आएको छ।
यद्यपि, अमेरिकी सेनाको उपस्थिति मध्यपूर्वमा अझै बाक्लो छ। बिहीबार एक अमेरिकी अधिकारीले दिएको जानकारीअनुसार हालै तैनाथ गरिएको युएसएस थिओडोर रुजवेल्ट विमानवाहक पोतका साथै युएसएस माल्किन आइल्यान्ड एम्फिबियस रेडिनेस ग्रुप त्यस क्षेत्रतर्फ अघि बढिरहेका छन्। अक्टोबरको अन्त्यसम्ममा सो क्षेत्रमा तीनवटा विमानवाहक पोतहरू पुग्न सक्ने ती अधिकारीले बताएका छन्।