जापानी महिलाको हत्या अभियोगमा अमेरिकी सैनिक पक्राउ, जापानद्वारा गम्भीर आपत्ति
प्रकाशित मिति : १८ आश्विन २०८३, आइतबार
Photo: Jacques Bonér/Unsplash
जापानको दक्षिणी टापु ओकिनावामा एक जापानी नागरिकको हत्या गरेको आशंकामा अमेरिकी सेनाका एक जवानलाई प्रहरीले नियन्त्रणमा लिएको छ।
स्थानीय प्रहरीले दिएको जानकारी अनुसार, २० वर्षीय मरीन कर्पोरल डेभिन जेकब बलार्डलाई शनिबार प्रान्तको राजधानी नाहास्थित एक होटलमा ३९ वर्षीया अन्ना यागीको हत्या गरी उनको वालेट र ब्याकप्याक लुटेको आशंका गरिएको छ। यद्यपि, बलार्डले भने यी आरोपहरू अस्वीकार गरेको प्रहरीले जनाएको छ।
फुतेन्मा एअर स्टेसनमा कार्यरत ती मरीनलाई आइतबार स्थानीय समय अनुसार बिहान १ बजे गिरफ्तार गरिएको थियो।
घटनाप्रति टिप्पणी गर्दै टोकियोस्थित अमेरिकी दूतावासले सामाजिक सञ्जाल ‘एक्स’ मा लेखेको छ, “घटनाका तथ्यहरू पत्ता लगाउन अनुसन्धान भइरहेको छ। अमेरिकी सरकारले जापानी सरकार र स्थानीय अधिकारीहरूसँग पूर्ण सहकार्य र सञ्चार गरिरहेको छ।”
जापानी प्रधानमन्त्री सानाए ताकाइचीले यस घटनालाई “अत्यन्तै क्रूर र जघन्य अपराध” को संज्ञा दिँदै भन्नुभएको छ, “यस्तो निकृष्ट घटना घट्नु अत्यन्तै दुखद र खेदजनक छ। जापानी सरकारको तर्फबाट हामीले अमेरिकी पक्षसमक्ष कडा विरोध दर्ता गराएका छौँ।”
यसैगरी, जापानको रक्षा मन्त्रालयले पनि अमेरिकी मरीनद्वारा गरिएको भनिएको यस अपराधप्रति गहिरो आक्रोश व्यक्त गर्दै अनुशासनमा कडाइ र यस्ता घटना दोहोरिन नदिन ठोस कदम चाल्न जोडदार माग गरेको छ।
ओकिनावामा मुख्यालय रहेको अमेरिकी मरीन कर्प्सको ‘थर्ड मरीन एक्सपेडिसनरी फोर्स’ले आफ्ना सैनिकमाथि लागेको गम्भीर आपराधिक आरोपबारे जापानी अधिकारीहरूलाई पूर्ण सहयोग गरिरहेको जनाएको छ। उसले भनेको छ, “मरीन कर्प्सले यी आरोपहरूलाई अत्यन्तै गम्भीरताका साथ लिएको छ र हरेक सैनिकले उच्च आचरण पालना गरोस् भन्ने अपेक्षा राख्छ। हाल ती सैनिक स्थानीय अधिकारीहरूको नियन्त्रणमा रहेका छन्।”
जापानका लागि अमेरिकी राजदूत जोर्ज गिलासले जापानी परराष्ट्र मन्त्रालय र ओकिनावाका गभर्नर गेन्टा कोजासँग कुराकानी गर्दै अनुसन्धानमा पूर्ण सहयोग गर्ने प्रतिबद्धता जनाएका छन्।
जापानमा हाल करिब १८,००० अमेरिकी मरीनहरू तैनाथ छन्, जसमध्ये बहुसंख्यक ओकिनावामै छन्। दोस्रो विश्वयुद्धको अन्त्यदेखि सन् १९७२ सम्म ओकिनावा टापु अमेरिकाको नियन्त्रणमा थियो। त्यहाँ अमेरिकी सैन्य उपस्थितिप्रति स्थानीय बासिन्दाहरूमाझ लामो समयदेखि असन्तुष्टि र आक्रोश रहँदै आएको छ।
यसअघि सन् १९९५ मा तीन जना अमेरिकी सैनिकहरूले १२ वर्षीया बालिकाको अपहरण गरी बलात्कार गरेपछि हजारौँ मानिसहरू सडकमा उत्रिएका थिए, जसका कारण वासिङ्टन र टोकियो सैन्य उपस्थिति घटाउन छलफल गर्न बाध्य भएका थिए।