उडानमै पाइलटमाथि छुरा प्रहार, १५० यात्रु सवार विमान साउदीमा सुरक्षित अवतरित
प्रकाशित मिति : १४ आश्विन २०८३, बुधबार
Photo: Sevcan Alkan /Unsplash
दुबईबाट इजरायलको तेल अवीवतर्फ जाँदै गरेको ‘फ्लाईदुबई’ को उडान संख्या एफजेट-१०७३मा सह-चालकले मुख्य पाइलटमाथि छुरा प्रहार गरेपछि विमानलाई साउदी अरबमा आपत्कालीन अवतरण गराइएको छ। तीन जना इजरायली अधिकारीहरूका अनुसार यो एक सम्भावित “आतंकवादी आक्रमण” को प्रयास हुन सक्ने अनुमान गरिएको छ।
उडानका क्रममा जोर्डनको आकाशमा पुगेपछि ककपिटभित्र मुख्य पाइलट र सह-चालकबीच हातहालाहाल भएको थियो। घटनालगत्तै क्याबिन क्रुका सदस्यहरू ककपिटमा प्रवेश गरी स्थिति नियन्त्रणमा लिएका थिए। आक्रमणपछि विमानलाई साउदी अरबको उत्तर-पश्चिमी क्षेत्रमा रहेको तबुक विमानस्थलमा सुरक्षित रूपमा अवतरण गराइएको छ।
उडान ट्र्याक गर्ने वेबसाइट ‘फ्लाइटराडार२४’ का अनुसार आपत्कालीन संकेत पठाउनुअघि बोइङ ७३७ विमान ३० सेकेन्डभन्दा कम समयमै करिब १४ हजार फिट तल खसेको थियो। विमानले सुरुमा सामान्य आपत्कालीन संकेत र त्यसपछि गैरकानुनी हस्तक्षेपको संकेत पठाएको थियो।
साउदी अरबको तबुक विमानस्थल प्रशासनका अनुसार घटनामा घाइते भएका दुवै पाइलटलाई उपचारका लागि अस्पताल भर्ना गरिएको छ। एक जना पाइलट गम्भीर घाइते भएका छन् भने अर्का पाइलट सामान्य घाइते छन्। आक्रमणकारी सह-चालक ओमानका नागरिक भएको एक इजरायली अधिकारीले बताएका छन्, यद्यपि यसबारे आधिकारिक पुष्टि हुन बाँकी छ।
विमानमा करिब १५० जना इजरायली यात्रुहरू सवार थिए। फ्लाईदुबईले सबै यात्रुहरू सुरक्षित रहेको जनाएको छ। एक यात्रुका अनुसार ककपिटबाट चीत्कार सुनिएको र रगतले लत्पतिएको दृश्य देखिएको थियो।
इजरायलका प्रधानमन्त्री बेन्जामिन नेतन्याहूले घटनालगत्तै राष्ट्रिय सुरक्षा बैठक बोलाएका छन्। प्रधानमन्त्री कार्यालयले परिस्थिति नियन्त्रणमा रहेको र यात्रुहरूलाई स्वदेश फर्काउन आवश्यक कदम चालिसकिएको बताएको छ।
साउदी अरब र ओमानका अधिकारीहरूले भने यस घटनाबारे हालसम्म कुनै आधिकारिक टिप्पणी गरेका छैनन्।