जुरी ड्युटीबारेका नियम परिवर्तन, दैनिक भत्तामा समेत वृद्धि
प्रकाशित मिति : असार २०, २०८२ शुक्रबार
फोटो: डेनियल फोस्टर
न्यूयोर्कमा अदालतको जुरी ड्युटीबारे केही नियमहरु परिवर्तन गरिएका छन् भने सेवा दिने नागरिकको दैनिक भत्तामा वृद्धि गरिएको छ। यसले नागरिकलाई न्याय प्रणालीको प्रक्रियामा सहभागी हुन थप प्रेरित गर्ने अपेक्षा गरिएको छ। यद्यपि भुक्तानी वृद्धिसँगै अदालतको नाममा हुने ठगी र जालसाजीका घटनाहरू पनि तीव्र रूपमा बढेकाले अदालतले नागरिकलाई अत्यन्तै सतर्क रहन आग्रह गरेको छ ।
हालसम्म न्यूयोर्कमा जुरी ड्युटीमा सेवा दिने नागरिकहरूलाई दैनिक ४० उपलब्ध गराइदै आएको थियो। तर जुन ९, २०२५ मा हस्ताक्षर गरिएको नयाँ बजेटअनुसार यो रकम बढेर अब प्रतिदिन ७२ डलर पुगेको छ। रोजगारदाताको जिम्मेवारीको सन्दर्भमा ११ वा सोभन्दा बढी कर्मचारी भएका रोजगारदाताहरूले अब आफ्ना कर्मचारीहरूलाई जुरी सेवाको पहिलो तीन दिनका लागि कम्तीमा ७२ डलर प्रति दिन भुक्तानी गर्नुपर्नेछ।
यदि कर्मचारीको दैनिक ज्याला ७२ डलरभन्दा कम भएमा रोजगारदाताले त्यो दैनिक ज्यालाको सम्पूर्ण रकम भुक्तानी गर्नुपर्छ र राज्यले ७२ पुर्याउनका लागि बाँकी रकम दिनेछ। १० वा सोभन्दा कम कर्मचारी भएका रोजगारदाताहरूलाई भने जुरी ड्युटीका लागि भुक्तानी दिन आवश्यक पर्दैन राज्यले ती कर्मचारीहरूलाई सीधै क्षतिपूर्ति दिनेछ। न्यूयोर्कको कानूनले जुरी सेवाका लागि कामबाट अनुपस्थित भएको कारण कर्मचारीलाई बर्खास्त वा कुनै पनि किसिमको दण्ड दिनबाट रोजगारदातालाई रोकेको छ।
जुरी ड्युटी अमेरिकी न्याय प्रणालीको एक अनिवार्य हिस्सा हो। यसलाई बेवास्ता गर्दा गम्भीर परिणामहरू निम्तिन सक्छन्। यदि तपाईंले जुरी समन प्राप्त गर्नुभयो र उपस्थित हुनुभएन भने तपाईंलाई सामान्यतया नयाँ समन पठाइनेछ। यदि तपाईंले दोस्रो समनपछि पनि प्रतिक्रिया दिनुभएन वा उपस्थित हुनुभएन भने तपाईंलाई गैरअनुपालनका लागि २५० डलर सम्मको जरिवाना लाग्न सक्छ।
न्यूयोर्क राज्यमा अदालतको जुरी ड्युटीमा बिना कारण अनुपस्थित भए एक हजार डलरसम्म जरिवाना र अदालतको अवहेलनाको आरोप लाग्न सक्छ। पटक–पटक अनुपस्थित भएमा थप कानुनी कारवाही हुन सक्छ। समयमै जानकारी दिएमा म्याद सार्न सकिन्छ। यद्यपि यस्ता कारबाहीहरू विरलै हुने गरेको भए पनि जुरी सेवामा अनुपस्थित हुनुलाई हल्का रूपमा लिनु हुँदैन। यदि तपाईं वैध कारणवश उपस्थीत हुन सक्नुहुन्न भने अदालतलाई अग्रिम जानकारी गराएर स्थगन वा माफीका लागि अनुरोध गर्नु महत्त्वपूर्ण हुन्छ।
न्यूयोर्कको राज्य वा संघीय अदालतमा जुरी सेवा गर्ने व्यक्ति व्यक्तिगत रूपमा रिपोर्ट गरेर वा टेलिफोन कलइन प्रणाली मार्फत सेवा गर्न उपलब्ध भएपछि सामान्यतया न्यूयोर्क राज्य अदालतहरूमा कम्तिमा छ वर्षसम्म फेरि सेवा गर्न पर्दैन । सामान्यतया दस दिनभन्दा बढी समय सेवा गर्ने जूरी सदस्य न्यूयोर्क राज्य अदालतहरूमा कम्तिमा आठ वर्षसम्म फेरि सेवा गर्न पर्दैन । टाउन वा भिलेज अदालतहरूमा सेवा गर्न भौतिक रूपमा रिपोर्ट गर्ने जूरी सदस्यहरू छ वर्षमा फेरि सेवा गर्न योग्य हुन्छन्। कुनै व्यक्ति सेवा गर्न योग्य छ भन्दैमा उनीहरूलाई बोलाइनेछ भन्ने होइन।
त्यस्तै न्यूयोर्क राज्यका चार संघीय जिल्ला अदालतहरूले सेवाबाट अयोग्यताको अवधिलाई फरक तरिकाले व्यवहार गर्छन्। पूर्वी, पश्चिमी र उत्तरी डिस्ट्रिक्टहरुले दुई वर्ष भित्र सेवा गरेको जो कोहीलाई पनि सेवाबाट छुट दिन्छ । दक्षिणी डिस्ट्रिक्टले चार वर्ष भित्र सेवा गरेको जो कोहीलाई छुट दिन्छ । यदि पूर्वी डिस्ट्रिक्ट (क्वीन्स, किंग्स, रिचमन्ड, नासाउ वा सफोक) मा तपाईंको सेवा टेलिफोन स्ट्यान्डबाइमा सीमित थियो भने तपाईंलाई संघीय अदालत सेवाबाट छुट दिइने छैन । उत्तरी डिस्ट्रिक्टका ३२ उत्तरी काउन्टीहरूमा राज्य अदालतमा जुरी छनौटमा भाग लिएको तर जुरीमा सेवा गर्न छनोट नभएको व्यक्तिलाई छुट छैन ।
जुरी ड्युटीको भत्ता वृद्धिको फाइदा उठाउँदै ठगहरू झनै सक्रिय भएका छन्। यी ठगहरू अदालतको नाममा फोन, इमेल र सामाजिक सञ्जालमार्फत सम्पर्क गर्दै जुरी ड्युटी छुटाएको वा नमानेको भन्दै तत्काल जरिवाना तिर्न माग गरिरहेका छन्।न्यूयोर्क राज्य अदालत प्रणालीले फोनमार्फत सार्वजनिक सदस्यहरूबाट कहिल्यै पनि वित्तीय वा पारिवारिक जानकारी सोध्दैन। अदालतको प्रतिनिधित्व गर्ने दाबी गर्ने कसैलाई पनि यस्तो जानकारी नदिन चेतावनी दिइएको छ । अदालतले जुरी सेवा छुटाएकोमा जरिवाना लगाउन सक्ने भए तापनि यसको सूचना फोन कलमार्फत कहिल्यै दिइँदैन, यसअघि धेरै प्रश्नावली र समनहरू पठाइएका हुन्छन्।
न्यूयोर्क राज्यका अदालतहरू र जुरी आयुक्तको कार्यालयले जुरीसम्बन्धी जरिवानाका लागि तपाईंलाई फोनमार्फत वा एप्पल पे, पेपाल, भेनमो, जेले जस्ता भुक्तानी एपहरू प्रयोग गरेर भुक्तानी गर्न कहिल्यै सोध्दैनन्। ठगी इमेलहरूले सामान्यतया प्राप्तकर्ताहरूलाई निश्चित दिन र समयमा अदालतमा रिपोर्ट गर्न निर्देशन दिन्छन्, र उनीहरूलाई कागजात र साक्षीहरू साथमा ल्याउन पनि भन्दछन्। उनीहरूले अदालतले तपाईंको अनुपस्थितिमा पनि कार्यवाही अगाडि बढाउन सक्ने र उपस्थित नभएमा कारबाही गरिने चेतावनी पनि दिन्छन्।
केही इमेलहरूले तपाईं कुनै ठूलो मुद्दामा ठूलो रकमको लाभग्राही भएको र तपाईंले इमेलमा जवाफ दिनुपर्ने सुझाव पनि दिन्छन्। यी इमेलहरूले प्राप्तकर्ताहरूलाई संलग्न रहेको अदालतको सूचना पढ्न निर्देशन पनि दिन सक्छन्। संलग्न फाइल वा लिङ्कले तपाईंको कम्प्युटरमा भाइरस फैलाउन सक्छ। त्यस्ता संलग्न फाइलहरू नखोल्नुहोस्। तत्काल इमेल मेटाउनुहोस्।
यदि तपाईं कुनै अदालतको कार्यवाहीमा संलग्न हुनुहुन्न र न्यूयोर्क राज्यका अदालतहरूलाई अदालतका सूचनाहरू प्राप्त गर्नका लागि इमेल ठेगाना प्रदान गर्नुभएको छैन भने अदालतले तपाईंलाई इमेलमार्फत सञ्चार गर्दैन। अदालत प्रणालीले अवांछित इमेल वा व्यक्तिगत जानकारीको लागि अनुरोधहरू पठाउँदैन। अदालत प्रणालीले तपाईं अदालतमा उपस्थित नभएमा कारबाहीको धम्की दिने इमेलहरू पठाउँदैन।