डिभी २०२४ का विजेतालाई अक्टोबरदेखि भिसा, १३ सय सम्म केस नम्बर हुने नेपाली पहिलो महिना योग्य
प्रकाशित मिति : श्रावण २३, २०८० मंगलबार
डिभी २०२४ का विजेताहरुले अक्टोबरदेखि भिसा पाउन सुरु गर्नेछन् तर १३ सय सम्म केस नम्बर हुने २०२४ का डिभी विजेता नेपालीहरु अक्टोबरमा भिसा पाउन योग्य हुने भएका हुन् । अमेरिकी विदेश मन्त्रालय ब्यूरो अफ कन्सुलर अफेयर्सले आज जारी गरेको भिसा बुलेटिन अनुशार डिभी २०२४ को पहिलो महिना नेपालीहरुलाई १३०० केस नम्बरको सिमाबन्दी लगाइएको छ ।
इरानलाई अक्टोबरमा १७५० सम्म केस नम्बरमा सिमाबन्दी लगाइएको छ भने एसियाका अन्य देशलाई २ हजार सम्म केस नम्बरको सिमाबन्दी छ । अफ्रिकामा अल्जेरिया, इजिप्ट र मोरक्कोलाई छुट्टै सिमाबन्दी लगाइएको छ भने बाँकी देशलाई १० हजार सम्म केस नम्बरको सिमाबन्दी लगाइएको छ ।
आर्थिक बर्ष २०२४ का डिभी विजेता नेपालीहरुको संख्या ३८६३ रहेको छ, जुन चालु आर्थिक बर्षको तुलनामा धेरै हो । आर्थिक बर्ष २०२३ का लागि ३८०८ जनाले डिभी लोटरी पारेका थिए । २०२४ मा पनि नेपाल धेरै डिभी लोटरी पार्नेमा एसियामा तेश्रो भएको छ । एसियामा सबैभन्दा धेरै इरानका ५ हजार ७७ जनाले र दोश्रोमा अफगानिस्तानका ४५३६ जनाले डिभी पारेका छन् ।
डिभी लोटरी २०२४ को नतिजा गत मे महिनाको पहिलो साता सार्वजनिक भएपनि यस अघि कुन देशका कतिकति जनालाई डिभी परेको थियो भन्नेबारे सार्वजनिक गरिएको थिएन । नतिजा सन् २०२४ को सेप्टेम्बरसम्म अनलाइनमा हेर्न सकिनेछ । गतबर्षको अक्टोबर ५ देखि नोभेम्बर ८ सम्म डिभी लोटरी भरेकाहरुले आफू छनौट भए नभएको हेर्न सक्नेछन् । यदि छनौट भएको खण्डमा उनीहरुले आगामी अक्टोबरदेखि अमेरिकाको भिसा पाउन थाल्नेछन् ।
कुल १ लाख ४३ हजार जनाले डिभी लोटरी पारेकोमा अधिकतम ५५ हजारसम्मले भिसा पाउनसक्नेछन् । गतबर्ष २ करोड २१ लाख ८५ हजार ६ सय १९ योग्यले डिभीका लागि आवेदन दिएका थिए । डिभी २०२३ को तुलनामा २०२४ मा धेरै व्यक्ति सहभागी भएका थिए । डिभी २०२३ मा ९५ लाख ७० हजार २ सय ९१ जना सहभागी भएका थिए भने २०२४ का लागि दोब्बरभन्दा धेरै सहभागी भए ।