एक्सक्लुसिभ: २०२१ का १३९३ डिभी विजेता नेपालीले पाए भिसा, नपाउनेहरु २४ सय बढी
प्रकाशित मिति : कार्तिक १२, २०७८ शुक्रबार
अमेरिकी दूतावास काठमाडौं
आर्थिक बर्ष २०२१ का डिभी विजेताहरुमध्ये कुल १३९३ जना नेपालीहरुलेमात्र भिसा पाउन र स्टाटस एड्जस्ट गर्न सफल भएको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । प्राथमिक डिभी विजेता र उनीहरुका परिवारका सदस्यहरुसहित १९९३ जनाले ६ महिनाको अवधिमा भिसा पाउन र स्टाटस एड्जस्ट गर्न सफल भएका हुन् ।
कोरोना महामारीका कारण र डोनाल्ड ट्रम्पले लगाएको आप्रवासन रोकका कारण अक्टोबरदेखि मार्चसम्म कुनै पनि डिभी विजेता नेपालीहरुले भिसा पाउन सकेनन् । अप्रिल र मे महिनामा पनि काठमाडौंमा रहेको अमेरिकी दूतावासले कुनै पनि नेपालीहरुलाई डाइभर्सिटी भिसा जारी गरेन । यद्यपी अप्रिलमा १० जना र मे मा ५ जना नेपालीहरुले काठमाडौंबाट अन्यत्रबाट भिसा पाउन वा स्टाटस एड्जस्ट गर्न सफल भएका थिए ।
जुन महिनाबाट काठमाडौंमा रहेको अमेरिकी दूतावासले डिभी विजेताहरुलाई भिसा जारी गर्न सुरु गरेको थियो । तर जुन महिनामा काठमाडौंबाट जम्मा १६ जनालाई डाइभर्सिटी भिसा जारी गरिएको थियो । यद्यपी जुन महिनामा कुल डाइभर्सिटी भिसा पाउने र स्टाटस एड्जस्ट गर्ने नेपालीहरुको संख्या २३ रहेको थियो । अमेरिकामा रहेका नेपालीहरुले डिभी पारेको खण्डमा युएससीआईएससमक्ष स्टाटस एड्जस्ट गर्नसक्छन् भने अन्य देशमा बसोबास गरिरहेका नेपालीहरुले डिभी पारेमा काठमाडौंबाहेक अन्य देशको दूतावासबाट समेत भिसा पाउन सक्छन् ।
जुलाईमा पनि काठमाडौंमा रहेको अमेरिकी दूतावासले अत्यन्तै कम अर्थात् जम्मा ८३ जनालाई डाइभर्सिटी भिसा जारी गरेको थियो । २ जनाले स्टाटस एड्जस्ट वा अन्य दूतावासबाट भिसा पाएका थिए । अर्थात जुलाईमा कुल ८५ जना नेपालीहरुले डाइभर्सिटी भिसा पाउन सफल भए ।
अगस्तमा भने अमेरिकी दूतावास काठमाडौंले उल्लेख्य संख्यामा डाइभर्सिटी भिसा जारी गरेको थियो । अर्थात् काठमाडौं दूतावासबाट अगस्तमा ४७९ जना नेपालीहरुले डाइभर्सिटी भिसा पाए । अन्य स्थानबाट पाउने र स्टाटस एड्जस्ट गर्नेहरुको संख्या जोड्दा कुल ४९३ जना नेपालीहरुले अगस्तमा डाइभर्सिटी भिसा पाएको देखिन्छ ।
अदालतले विदेश मन्त्रालयबाट लागु भिसाको प्राथमिकता खारेज गरेर असल नियतका साथ डाइभर्सिटी भिसा जारी गर्नका लागि आदेश दिएपछि सेप्टेम्बरमा काठमाडौं दूतावासले ७५९ जनालाई डाएभर्सिटी भिसा जारी गरेको थियो । अन्य स्थानबाट पाउने र स्टाटस एड्जस्ट गर्नेहरुको संख्या जोड्दा कुल ७७७ जना नेपालीहरुले सेप्टेम्बरमा डाइभर्सिटी भिसा पाएको देखिन्छ ।
२०२१ का डिभी विजेता थप नेपालीले भिसा पाउने अपेक्षा
अदालतले डिभी २०२१ का कुल ८३६१ भिसा संरक्षण गर्न अमेरिकी सरकारलाई आदेश दिएको छ । गुड लक भर्सेस बाइडेन मुद्दामा अदालतले ६९१४ विजेताका भिसा संरक्षण गर्न अमेरिकी सरकारलाई आदेश दिएको छ भने अरु थप दुई वटा आदेशमा ४८१ र ९६६ भिसा संरक्षणको आदेश दिइएको हो ।
सेप्टेम्बर २७ मा वासिंटन डिसीको अदालतले कोरोना सम्बन्धित यात्रा प्रतिबन्धहरुका कारण भिसा पाउन नसकेका आर्थिक बर्ष २०२१ का डिभी विजेताहरुका लागि ९६६ भिसा संरक्षण गर्न आदेश दिएको थियो । अक्टोबर २० मा यसबारे अदालतले थप आदेश दिएको थियो । जसमा यी भिसाहरुको प्रकृयापनि यथाशीघ्र सुरु गर्न र आगामी सेप्टेम्बरभित्र पूरा गर्न विदेश मन्त्रालयलाई आदेश दिइएको थियो । मुद्दामा नाम नभएकाहरुलाई समेत भिसा जारी गर्न भनिएको छ ।
त्यस्तै सेप्टेम्बर ३० मा दिइएको आदेशमा ६ हजार ९ सय १४ भिसा संरक्षणको आदेश दिइएको थियो । सेप्टेम्बर ३० कै अर्को आदेशमा थप ४८१ भिसा संरक्षण गर्न र आर्थिक बर्ष २०२२ भित्र जारी गर्न आदेश दिइएको थियो । ४८१ भिसाहरु मुद्दामा नाम भएकाहरुलाईमात्र जारी गरिनेछ ।
भिसा पाउन नसकेका २०२१ का डिभी विजेता केही नेपालीहरुले आगामी दिनमा अदालतको आदेश अनुशार भिसा पाउने देखिन्छ ।
ट्रम्पको पालामा भन्दा बाइडेनका पालामा कमलाई भिसा
सन् २०२१ का लागि डिभी विजेता नेपालीहरुको संख्या ३८०१ रहेको थियो । सन् २०२१ का डिभी विजेताहरुमा नेपाल एसियामा दोश्रो भएको थियो । गत आर्थिक बर्ष २०२० मा कोरोना महामारीका बाबजुत पनि २ हजार ८५ जना नेपालीहरुले डाइभर्सिटी भिसा पाउन वा स्टाटस एड्जस्ट गर्न सफल भएका थिए । तर २०२१ मा त्यो भन्दा पनि कमले भिसा पाएका छन् ।
आर्थिक बर्ष २०१९ मा २७९५, आर्थिक बर्ष २०१८ मा ३३०७, आर्थिक बर्ष २०१७ मा ३४७७ र आर्थिक बर्ष २०१६ मा ३२४७ जना नेपालीहरुले डाइभर्सिटी भिसा पाउन वा डाइभर्सिटी भिसामार्फत स्टाटस एड्जस्ट गर्न सफल भएका थिए ।