२०१९ का डिभी विजेता नेपालीमध्ये १५६६ लाई भिसा, २०६७ अयोग्य
प्रकाशित मिति : कार्तिक १२, २०७६ मंगलबार
आर्थिक बर्ष २०१९ का लागि डिभी जितेकामध्ये २ हजार ६७ जना नेपालीहरु भिसाका लागि अयोग्य भएका छन् । उनीहरु डिभी लोटरी पारेर पनि भिसाका लागि अयोग्य भएका हुन् । सेप्टेम्बरको अन्त्यमा समाप्त भएको उक्त आर्थिक बर्षमा डिभी लोटरीका १५६६ प्राथमिक विजेताहरुलेमात्र भिसा प्राप्त गरेका छन् ।
अमेरिकी सरकारले भिसा पाउने डिभी विजेता नेपालीहरुको अन्तिम संख्या सार्वजनिक गरेको हो ।
आर्थिक बर्ष २०१९ को १२ महिनामा जम्मा १५६६ जना प्राथमिक डिभी विजेता नेपालीहरुलेमात्र अमेरिकाको भिसा प्राप्त गरे । जबकी आर्थिक बर्ष २०१९ का लागि ३६३३ जना नेपालीहरुले डिभी लोटरी पारेका थिए ।
२०१९ को सेप्टेम्बरमा जम्मा २३ जना डिभी लोटरीका प्राथमिक विजेता नेपालीहरुले भिसा पाए । उनीहरुका दम्पत्ति र छोराछोरीसहित भने सेप्टेम्बरमा ४६ जनाले भिसा पाएका थिए । अगस्त महिनामा ७२ जना नेपालीहरुले मात्र डाइभर्सिटी भिसा प्राप्त गरे । जुलाई महिनामा २८४ जना नेपालीहरुले डाइभर्सिटी भिसा प्राप्त गरेका थिए ।
जुन महिनामा डिभीमार्फत ३३१ जना नेपालीहरुले अमेरिकाको भिसा पाएका थिए । ३३१ जनामध्ये १९८ जना प्राथमिक डिभी विजेताहरु, ७० जना उनीहरुका दम्पत्ति र ६३ जना छोराछोरीहरु रहेका छन् ।
मे महिनामा डिभीमार्फत ३१९ जना नेपालीहरुले अमेरिकाको भिसा प्राप्त गरेका थिए । जसमध्ये १८३ जना प्राथमिक डिभी विजेताहरु थिए भने ७३ जना उनीहरुका दम्पत्ति र ६३ जना उनीहरुका छोराछोरीहरु रहेका थिए ।
अप्रिलमा ३४१, मार्चमा ३२३, फरबरीमा ४५७, जनवरीमा ७३ जना, डिसेम्बरमा १७४ जना, नोभेम्बरमा १९१ र अक्टोबरमा १५१ जना नेपालीहरुले डिभीमार्फत भिसा प्राप्त गरेका थिए ।
डिभी विजेता कैयन नेपालीहरुको भिसा पब्लिक चार्जको आधारमा समेत रिजेक्ट गरिएको छ । सन् २०१९ का लागि डिभी विजेताहरुले सन् २०१९ को सेप्टेम्बर अन्त्यसम्म भिसा प्राप्त गरेका छन् । त्यतीेबेलासम्म भिसा नपाएकाहरुको डिभी स्वत खारेज भएको छ ।