Follow @khasokhasmag

ट्रम्पको विरोधका बाबजुत अक्टोबरमा डिभी लोटरी खुल्ने


प्रकाशित मिति : भाद्र ५, २०७६ बिहीबार

अमेरिकी राष्ट्रपति डोनाल्ड ट्रम्पले डिभी लोटरीको चर्को विरोध गरेपनि आगामी अक्टोबरमा डिभी लोटरी खुल्ने भएको छ । राष्ट्रपति ट्रम्पले डिभी लोटरी जित्नेहरुले खराब मध्येका खराब, रद्दीको टोकरीमा फालिएका जस्ता अपमानजनक शब्दहरु प्रयोग गर्दै आएका छन् ।

डिभी लोटरी खारेज गर्नका लागि अमेरिकी संसदले बिल पारित गर्नुपर्ने भएकाले त्यस्तो कुनै बिल पारित नहुँदा आगामी अक्टोबरमा डिभी लोटरी खुल्ने भएको हो । तर कुन मितिदेखि डिभी लोटरी भर्न सकिने भन्ने सन्दर्भमा अमेरिकी सरकारले छुट्टै सुचना जारी गर्नेछ ।

आर्थिक बर्ष २०१९ का लागि डिभी लोटरी विजेताहरुले आगामी सेप्टेम्बरको अन्त्यसम्ममा भिसा प्राप्त गर्नेछन् । आर्थिक बर्ष २०२० का लागि डिभी लोटरी परेकाहरुले आगामी अक्टोबरदेखि भिसा प्राप्त गर्न थाल्नेछन् । आगामी अक्टोबरमा डिभी भरेर विजेता हुनेले आर्थिक बर्ष २०२१ मा भिसा प्राप्त गर्नेछन् ।

अमेरिकी राष्ट्रपति डोनाल्ड ट्रम्पले अमेरिकी संसदलाई डिभी लोटरी खारेज गरेर मेरिटमा आधारित ग्रिनकार्ड प्रणाली लागु गर्न आब्हान गर्दै आएका छन् । तर वर्तमान संसदमा सिनेटमा रिपब्लिकनको र हाउसमा डेमोक्र्याट्सको बहुमत रहेका कारण कुनै पनि एकदलीय बिल पारित हुन लगभग असम्भव जस्तै छ ।

डिभी लोटरी भर्ने र पार्नेहरुमा नेपालीहरुको संख्या उल्लेख्य रहेको छ । त्यस्तै डिभी मार्फत अमेरिका आउने नेपालीहरुको संख्या पनि उल्लेख्य नै रहेको छ ।

‘डिभी लोटरी भिसा एकदमै खतरनाक’

युएससीआईएसका कार्यकारी निर्देशक केन कुसिनेलीलाई डिभी लोटरी भिसा एकदमै खतरनाक रहेको बताउँदै आएका छन् । उनले राष्ट्रपति डोनाल्ड ट्रम्पलाई मेन्सन गरेर ट्वीट गर्दै राष्ट्रपति ट्रम्प र आफूले डिभी लोटरी अन्त्य भएको देख्न चाहेको बताएका थिए ।

डिभी लोटरीमा जस्तो खतरनाक छिद्र भएको नभई मेरिटमा आधारित अध्यागमन प्रणालीको समय भएको उनले बताएका थिए । सिरियामा कार्यरत एकजना आईसीस स्नाइपर अमेरिकी डिभी लोटरी विजेता रहेको खुलासा भएपछि ट्रम्पले डिभी लोटरीको अझ चर्को विरोध गरेका थिए ।

सन् १९७६ को फरबरी २७ मा काजकिस्तानमा जन्मिएका रसियन मारातोभिच आसाइनोभ सन् १९९९ को फरबरी २७ मा डिभी लोटरीमार्फत अमेरिका छिरेको खुलासा भएको थियो । त्यसपछि सन् २००६ को सेप्टेम्बर १ मा अमेरिकी नागरिकता प्राप्त गरेका थिए ।

नेपालीहरु अग्रपंक्तिमा

डिभी लोटरीमार्फत अमेरिका आउने नेपालीहरु अग्रपंक्तिमा रहेका छन् । आर्थिक बर्ष सन् २०२० का लागि पनि ३६९६ जना नेपालीहरुलाई डिभी लोटरी परेको छ ।

उनीहरुले सन् २०१८ को अक्टोबर ३ देखि नोभेम्बर ६ सम्म डिभी लोटरी भरेका थिए भने सन् २०१९ को मे महिनामा डिभी लोटरीको नतिजा सार्वजनिक भएको थियो । उनीहरुले आगामी अक्टोबर महिनादेखि अमेरिकाको भिसा प्राप्त गर्न सुरु गर्नेछन् ।

सन् २०२० का लागि डिभी लोटरी पार्नेमा नेपालीहरु विश्वमा नै तेश्रो नम्बरमा रहेका छन् । पहिलो नम्बरमा रसियनहरु र दोश्रो नम्बरमा इरानीहरु रहेका छन् । सन् २०२० का लागि ५ हजार १ सय १८ जना रसियनहरुले डिभी लोटरी पारेका छन् भने इरानीहरु ४१०१ जना रहेका छन् ।

एसियाका मुलुकहरुको तुलना गर्ने सन् २०२० का लागि डिभी लोटरी पार्नेमा नेपालीहरु दोश्रो नम्बरमा रहेका छन् इरानीहरु पहिलो नम्बरमा रहेका छन् ।

सन् २०२० का लागि विश्वभरबाट ८३ हजार ८८४ जनाले डिभी लोटरी पारेका थिए । ती मध्येबाट छानिएर ५५ हजारले अमेरिकाको भिसा प्राप्त गर्नेछन् । सन् २०२० का लागि विश्वभरबाट १ करोड ४७ लाख २२ हजार ७ सय ९८ जनाले डिभी लोटरी फारम भरेका थिए । उनीहरुका आफन्तहरुसहित डिभीमा सहभागी २ करोड ३१ लाख ८२ हजार ५५४ जना रहेका थिए ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com