अमेरिकामा टिकटबिनै विमानस्थलको गेटसम्म जाने सुविधामा ब्रेक, टीएसएले पुनः १३ विमानस्थलमा खुम्च्यायो कार्यक्रम
प्रकाशित मिति : ३० आश्विन २०८३, शुक्रबार
(आधिकारिक होमल्याण्ड सेक्युरिटी तस्बिर/ ब्यारी बहलर)
अमेरिकी यातायात सुरक्षा प्रशासनले हवाई टिकट नभएका यात्रुहरूलाई पनि सेक्युरिटी चेकिङ पार गरेर गेटसम्म जान दिने आफ्नो नयाँ कार्यक्रम “गेट्साइड बाइ टिएसए प्री-चेक”को विस्तारलाई अचानक रोकेको छ। केही समयअघि देशभरका सयौँ विमानस्थलमा विस्तार गरिएको भनिएको यो कार्यक्रमलाई हाल पुनः प्रारम्भिक १३ वटा विमानस्थलमा मात्र सीमित गरिएको छ।
गत सेप्टेम्बर महिनामा टिएसएले यो कार्यक्रम निकै भव्यताका साथ सुरु गरेको थियो। यस कार्यक्रमअन्तर्गत प्री-चेकका सदस्यहरूले भ्रमण हुनुभन्दा १ देखि ३ दिनअघि अनलाइन आवेदन दिएर टिकटबिनै विमानस्थलको सेक्युरिटी जाँच पार गर्ने पास पाउन सक्थे।
टिएसएले आफ्नो वेबसाइटमा यस कार्यक्रमको घोषणा गर्दै लेखेको थियो: “यो नयाँ कार्यक्रमले आफन्तहरूलाई बिदा गर्न वा स्वागत गर्न गेटसम्मै पुग्न, ट्रान्जिट वा ले-ओभरमा रहेका साथीहरूलाई भेट्न र विमानस्थल भित्रका रेस्टुरेन्ट तथा पसलहरूको आनन्द लिन सहज बनाएको छ। यसले हवाई यात्राका पुराना र अविसरणीय क्षणहरूलाई पुनः फर्काएको छ।”
यसै महिना प्रकाशित प्रेस विज्ञप्तिहरूका अनुसार यो सुविधालाई अमेरिकाभरका सयौँ अन्य विमानस्थलहरूमा पनि विस्तार गरिएको थियो। नयाँ सूचीमा परेको डेनभर अन्तर्राष्ट्रिय विमानस्थलमा स्थानीय समाचार माध्यम केयुएसएले गत हप्ता मात्रै यो सुविधा प्रयोग गरेर समाचार तयार पारेको थियो। तर, विस्तार गरिएको केही दिनभित्रै टिएसएले चुपचाप यो निर्णय फिर्ता लियो।
डेनभर विमानस्थलल दिएको एक बयान अनुसार, “टिएसएले हालका लागि ‘गेट्साइड बाय टिएसए प्र-चेक’ को सञ्चालनलाई पुनः पुराना १३ वटा विमानस्थलमा मात्र सीमित गरेको छ।” टिएसएले यो पहुँच किन घटायो भन्नेबारे कुनै स्पष्टीकरण दिएको छैन र यसबारे सोधिएका प्रश्नहरूको जवाफ पनि दिएको छैन।
भर्जिनियास्थित नोर्फोक अन्तर्राष्ट्रिय विमानस्थललाई त यो कार्यक्रम रोकिएको खबर सर्वसाधारणका गुनासाहरूबाट मात्र थाहा भयो। विमानस्थलका मुख्य मार्केटिङ तथा सञ्चार अधिकृत क्रिस जोन्सले भने, “हामीलाई सामाजिक सञ्जाल र इमेलमार्फत केही मानिसहरूले टिएसएको अनलाइन पोर्टलमा आवेदन दिँदा ओआरएफको नाम नभेटिएको गुनासो गरे। मैले आफैं लग-इन गरेर हेर्दा पनि मेनुमा हाम्रो विमानस्थलको नाम थिएन।”
टिएसएको पोर्टल वा वेबसाइटको मेनुमा विमानस्थलको नाम समावेश नभएसम्म प्रयोगकर्ताले पासका लागि आवेदन दिन सक्दैनन्।
हाल यो सुविधा अमेरिकाका १३ वटा प्रारम्भिक विमानस्थलहरूमा मात्र सीमित गरिएको छ। यसअन्तर्गत एरिजोनाको मेसा गेटवे विमानस्थल, ओहायोको जोहन ग्लेन कोलम्बस अन्तर्राष्ट्रिय विमानस्थल, टेक्ससको डलास फोर्ट वर्थ अन्तर्राष्ट्रिय विमानस्थल, मिसिगनको डेट्रोइट मेट्रोपोलिटन वेन काउन्टी विमानस्थल, र कान्सासको विचिटा ड्वाइट डी. आइजनहावर राष्ट्रिय विमानस्थल रहेका छन्।
त्यसैगरी, इन्डियानाको इन्डियानापोलिस अन्तर्राष्ट्रिय विमानस्थल, नेभाडाको ह्यारी रिड अन्तर्राष्ट्रिय विमानस्थल, क्यालिफोर्नियाको लस एन्जेलस अन्तर्राष्ट्रिय विमानस्थल, र अर्कान्ससको बिल एन्ड हिलारी क्लिन्टन राष्ट्रिय विमानस्थलमा पनि यो सुविधा यथावत राखिएको छ।
यसका साथै, ओक्लाहोमा सिटीको विल रोजर्स अन्तर्राष्ट्रिय विमानस्थल, नेब्रास्काको एप्ले एयरफिल्ड, क्यालिफोर्नियाको सान डिएगो अन्तर्राष्ट्रिय विमानस्थल, र युटाको साल्ट लेक सिटी अन्तर्राष्ट्रिय विमानस्थलमा मात्र अब यो सेवा प्राप्त गर्न सकिनेछ।