अमेरिकी विदेश मन्त्रालयले २०२० र २०२१ का डिभी विजेताको केस रेकर्ड तत्काल नहटाउने
प्रकाशित मिति : असार १४, २०८१ शुक्रबार
अमेरिकी विदेश मन्त्रालयले २०२० र २०२१ का भिसा नपाएका डिभी विजेताको केस रेकर्ड तत्काल नहटाउने भएको छ । मुद्दा समाप्त नभएसम्मका लागि अमेरिकी विदेश मन्त्रालयले डिभी विजेताहरुको रेकर्ड प्रणालीमा नै राख्ने भएको छ । सामान्तया निश्चित आर्थिक बर्षका लागि डिभी कार्यक्रम समाप्त भएपछि केस रेकर्ड हटाउने गरिन्छ ।
मंगलबार वासिंटन डिसीमा रहेको पुनरावेदन अदालतले बाइडेन प्रशासनका पक्षमा फैसला गर्दै भिसा पाउन बाँकी रहेका २०२० र २०२१ का डिभी विजेतालाई भिसा दिन नसकिने निर्णय गरेको थियो । २०२० र २०२१ का डिभी विजेताका मुद्दाहरूमा पुनरावेदन अदालतले तल्लो अदालतको निर्णयलाई मंगलबार उल्टाएको थियो ।
तल्लो अदालतका न्यायाधीश मेहता र न्यायाधीश चुटकनले गरेको आदेशविरुद्ध बाइडेन प्रशसनले पुनरावेदन गरेको थियो । मंगलबारको फैसलासँगै २०२० र २०२१ का झण्डै २० हजार भिसा पाउन बााकी रहेका डिभी विजेताहरुको अध्यागमन यात्रा थप अनिश्चित भएको छ । यद्यपी यसबारेमा थप मुद्दाहरु पर्नसक्ने सम्भावनालाई मध्यनजर गरेर अमेरिकी विदेशमन्त्रालय केस रेकर्ड भने कायमै राख्ने भएको हो ।
आर्थिक वर्ष २०२० र २०२१ समाप्त भएपछि वादीहरूले डाइभर्सिटी भिसाका लागि आफ्नो योग्यता गुमाएको र डिस्ट्रिक्ट कोर्टहरुले यी स्पष्ट वैधानिक समयसीमाहरू ओभरराइड गर्नको लागि एक न्यायोचित अधिकार दाबी गर्न गल्ती गरेको अदालतको फैसलामा उल्लेख छ । त्यसैले सरकारलाई चुनौती दिएका डिस्ट्रिक्ट कोर्टका आदेशहरूलाई उल्टाउने अदालतको आदेशमा भनिएको छ ।
वासिंटन डिसीको पुनरावेदन अदालतमा यसबारेको मुद्दा लामो समयदेखि विचाराधिन रहेको थियो । डिभी २०२० र २०२१ का विजेतालाई भिसा जारी गर्न अमेरिकी सरकारले आवश्यक प्रविधि भने जडान गरिसकेको थियो । विदेश मन्त्रालयको ब्यूरो अफ कन्सुलर अफेयर्सले सबै अदालतमा पेश गरेको कागजातमा विगतका बर्षका डिभीलाई प्रकृयामा लैजानका लागि प्रविधिमा आवश्यक सुधार गरिसकेको थियो ।
अदालतको फैसलासँगै अमेरिकी विदेश मन्त्रालयले डिभी २०२० र २०२१ सँग सम्बन्धित केसहरु प्रशोधन नगर्ने प्रष्ट पारिसकेको छ । प्रभावित व्यक्तिले योग्य भएको खण्डमा डिभी २०२६ को कार्यक्रममा भाग लिनसक्ने र त्यसका लागि आगामी अक्टोबरमा खुल्ने डिभी भर्नुपर्ने विदेश मन्त्रालयको भनाई छ । आगामी अक्टोबरमा खुल्ने डिभी नोभेम्बरको पहिलो साता बन्द हुनेछ । भिसा नपाएका डिभी विजेताहरु ती कार्यक्रममा भाग लिन योग्य हुन सक्छन् ।
सन् २०२१ को अगस्त १७ मा तल्लो अदालतले डिभी २०२० का ९०९५ भिसा संरक्षणका लागि आदेश दिएको थियो । त्यसपछि अक्टोबर २३ मा जारी गरिएको आदेशमा यी भिसाहरु सन् २०२२ को सेप्टेम्बर ३० अगाडि जारी गर्न आदेश दिइएको थियो । तर २०२२ को अप्रिल ५ मा पुनरावेदनको निर्णय नआउँदासम्म भिसा जारी सुरु गर्न नपर्नेगरी अदालतले आदेश दिएको थियो ।
सन् २०२१ को सेप्टेम्बर २७ मा अदालतले कार्यकारी आदेशका कारण भिसा जारी हुन नसकेका २७ दुतावास र पोष्टका लागि डिभी २०२१ का ९६६ भिसा संरक्षणका लागि आदेश दिएको थियो । सन् २०२१ कै अक्टोबर २० मा यी भिसाहरु सकभर छिटो जारी गर्न आदेश दिइएपनि सन् २०२२ को अप्रिल ६ को आदेशमा पुनरावेदनको फैसला नआउँदासम्म भिसा जारी गर्न प्रतिक्षा गर्नसकिने व्यवस्था गरिएको थियो ।
त्यस्तै सन् २०२१ सेप्टेम्बर ३० को आदेशमा ६ हजार ९ सय १४ भिसा संरक्षणको आदेश दिइएको थियो । तर यसका सन्दर्भमा पनि अप्रिल १८ मा अदालतले पुनरावेदनको निर्णय नआउँदासम्म भिसा जारी गर्नु नपर्ने निर्णय गरेको थियो । त्यस्तै सन् २०२१ को सेप्टेम्बर ३० कै आदेशमा ४८१ भिसा संरक्षणको आदेश दिएपनि २०२२ को अप्रिल ६ को आदेशमा अदालतले पुनरावेदनको निर्णय नआउँदासम्म भिसा जारी गर्नु नपर्ने निर्णय गरेको थियो ।