१० हजार २५० सम्म केस नम्बर हुने नेपाली डिभी विजेतालाई जुलाईमा भिसा
प्रकाशित मिति : बैशाख २६, २०८१ बुधबार
डिभी २०२४ का नेपाली विजेताको केस नम्बर जुलाईका लागि एकैपटक १७ सय ५० थप गरिएको छ । जुनमा ८ हजार ५ सय सम्म केस नम्बर हुने नेपाली डिभी विजेताहरुले भिसा पाउन सक्ने भएकोमा जुलाईका लागि १० हजार २ सय ५० बनाइएको छ । अर्थात् जुलाई महिनामा १० हजार २ सय ५० सम्म केस नम्बर हुने नेपालीहरुले डाइभर्सिटी भिसा प्राप्त गर्न सक्नेछन् ।
चालु आर्थिक बर्ष २०२४ का डिभी विजेता नेपालीहरुको संख्या ३८६३ रहेको छ, जुन चालु आर्थिक बर्षको तुलनामा धेरै हो । नतिजा सन् २०२४ को सेप्टेम्बरसम्म अनलाइनमा हेर्न सकिनेछ । सन् २०२२ को अक्टोबर ५ देखि नोभेम्बर ८ सम्म डिभी लोटरी भरेकाहरुले अहिले भिसा पाइरहेका छन् ।
कुल १ लाख ४३ हजार जनाले डिभी लोटरी पारेकोमा अधिकतम ५५ हजारसम्मले मात्र भिसा पाउनसक्नेछन् । अर्थात् डिभी पर्दैमा सबैजना अमेरिका आउन पाउने ग्यारेन्टी हुँदैन । डिभी २०२४ का लागि विश्वभरबाट २ करोड २१ लाख ८५ हजार ६ सय १९ योग्यले डिभीका लागि आवेदन दिएका थिए ।
चालु आर्थिक बर्षको ६ महिनाको अवधिमा १४५५ जना नेपालीहरुले डाइभर्सिटी भिसा पाएका छन् । डिसेम्बरमा ४१४ जना नेपालीहरुले डाइभर्सिटी भिसा पाएकोमा जनवरीमा ३११ जना र फेब्रुअरीमा २६८ जना नेपालीहरुले अमेरिकाको डाइभर्सिटी भिसा पाएको अमेरिकी सरकारको विदेश मन्त्रालय ब्यूरो अफ कन्सुलर अफेयर्सको तथ्यांकले देखाएको छ ।
मार्चमा १९८ जना नेपालीहरुले डाइभर्सिटी भिसा पाएका छन् । चालु आर्थिक बर्षको पहिलो महिना अक्टोबरमा जम्मा ३ जना र दोश्रो महिना नोभेम्बरमा जम्मा २६१ जना नेपालीहरुले डाइभर्सिटी भिसा पाएका थिए ।