अमेरिकी सरकारबाट संसदले तोकेको ५५ हजार कोटाभन्दा १०३८ बढीलाई डाइभर्सिटी भिसा प्रदान
प्रकाशित मिति : भाद्र २६, २०८० मंगलबार
अमेरिकी सरकारले आर्थिक बर्ष २०२३ का डिभी विजेताहरुका सन्दर्भमा संसदले तोकेको ५५ हजार कोटाभन्दा १०३८ बढीलाई डाइभर्सिटी भिसा प्रदान गरेको खुलासा भएको छ । अन्तरवार्ता दिइसकेपछि पनि एडमिनिस्ट्रेटिभ प्रोसेसमा अड्किएका डिभी लोटरी विजेताको एक मुद्दामा सरकारका तर्फबाट दायर गरिएकोमा घोषणामा यसको खुलासा भएको हो ।
बाइडेन प्रशासनले डिभी २०२३ का लागि ५६ हजार ३८ डाइभर्सिटी भिसाहरू जारी गरिएको छ । यो संख्या अमेरिकी संसदले तोकेको डाइभर्सिटी भिसाको सिमाबन्दी भन्दा १०३८ ले बढी हो । केही दिन अगाडिमात्र अमेरिकी विदेश मन्त्रालयले ५५ हजारको कोटा पूरा हुन लागेको भन्दै सुचना जारी गरेको थियो । फलस्वरूप पछिल्ला केही दिनहरूमा विश्वभरका अमेरिकी दूतावासहरूले डिभी विजेताहरुका लागि तय गरिएका ४ हजार भन्दा बढी अन्तर्वार्ताहरू रद्द गरेका थिए ।
भिसा कोटाको सिमाबन्दी नाघ्नु सरकारका लागि कानुनी नभएकाले रिपब्लिकनहरुले यसबारे कदम चाल्नसक्ने आशंका गरिएको छ । आफ्नो कार्यकालको पहिलो दिनमा राष्ट्रपति जो बाइडेनले संसदमा पठाएको अध्यागमन बिलमा डाइभर्सिटी भिसाको सीमा ५५ हजारबाट बढाएर ८० हजार बनाउने प्रस्ताव गरेपनि उक्त बिल पारित भइसकेको छैन ।
बाइडेन प्रशासनले कोटाभन्दा बढी डिभी विजेतालाई भिसा प्रदान गरेको यो लगातार दोस्रो वर्ष हो । गत आर्थिक बर्ष २०२२ मा पनि ५४ हजार ३ सय ३४ डाइभर्सिटी भिसा अमेरिकी विदेश मन्त्रालयले र १४४० जना विजेतालाई युएससीआईएसले स्थीति समायोजन गरेको थियो । अर्थात् कोटाभन्दा ७७४ जना बढीले अमेरिकाको डाइभर्सिटी भिसा पाएका थिए । यद्यपी भिसा पाइसकेका कसैलाई पनि रोकिएको भने थिएन ।
अमेरिकी अध्यागमन कानून अन्तर्गत कुनै पनि एउटा देशले कुनै एक आर्थिक वर्षमा उपलब्ध भिसा संख्याको सात प्रतिशत भन्दा बढी प्राप्त गर्न नसक्ने भएकाले अल्जेरिया र नेपाल जस्ता केही देशहरू यो कोटाको नजिक पुगेकाले देश विशिष्ट संख्यात्मक सीमाहरू नाघ्नबाट बच्न भिसा अप्वाइन्टमेन्टहरु रद्द गरिने अमेरिकी विदेश मन्त्रालयको बताएको थियो ।
कुनै पनि आर्थिक बर्षका लागि सेप्टेम्बरको अन्तिमसम्म भिसा जारी गर्न सकिने भएतापनि यो बर्ष आर्थिक बर्ष सकिनु ३ साता अगाडि नै सबै डाइभर्सिटी भिसाहरु जारी गरिएको हो । डिभी कार्यक्रम तीनसाता अगाडि नै समाप्त हुँदा भिसा प्राप्त गर्न असमर्थ भएका डिभी विजेताहरुका लागि निराशाजनक हुनसक्ने अमेरिकी विदेश मन्त्रालयले जनाएको छ ।
डिभी २०२५ का लागि अक्टोबरको सुरुमा आवेदन खुलाइने उल्लेख गर्दै अमेरिकी विदेश मन्त्रालयले आवेदन दिन योग्य सबैलाई डिभी भर्न प्रोत्साहन गरेको छ । आर्थिक बर्ष २०२३ का डिभी विजेता नेपालीहरुको संख्या ३८०८ रहेको थियो । तर उनीहरुमध्ये कतिजनाले भिसा पाए भन्नेबारे पूर्ण विवरण सार्वजनिक भएको छैन ।
मे महिनामा उल्लेख्य संख्यामा नेपाललाई डाइभर्सिटी भिसा दिएको अमेरिकाले जुन र जुलाईमा भने अत्यन्तै कम नेपालीलाईमात्र डाइभर्सिटी भिसा दिएको थियो । अमेरिकी सरकारको विदेश मन्त्रालय ब्यूरो अफ कन्सुलर अफेयर्सको तथ्यांक अनुशार मे मा ६९६ जना नेपालीहरुले अमेरिकाको डाइभर्सिटी भिसा पाएकोमा जुनमा जम्मा १३१ जना र जुलाईमा जम्मा १३७ जना मात्र नेपालीले अमेरिकाको डाइभर्सिटी भिसा पाएका थिए ।
आर्थिक बर्ष २०२३ को १० महिनामा २९१३ जना नेपालीलाई डाइभर्सिटी भिसा प्रदान गरिएको थियो । अप्रिलमा ८२० जना नेपालीहरुलाई डाइभर्सिटी भिसा प्रदान गरिएको थियो जुन मार्च महिनाको तुलनामा दोब्बरभन्दा धेरै हो । मार्चमा ३७२ जना नेपालीहरुलाई डाइभर्सिटी भिसा प्रदान गरिएको थियो ।
अमेरिकी सरकारको विदेश मन्त्रालय ब्यूरो अफ कन्सुलर अफेयर्सका अनुशार गत अक्टोबरबाट सुरु आर्थिक बर्ष २०२३ को सुरुका २ महिनामा २ जना नेपालीलाईमात्र डाइभर्सिटी भिसा दिइएपनि डिसेम्बर, जनवरी र फरबरीमा भने ७५७ जनालाई डाइभर्सिटी भिसा प्रदान गरिएको हो ।
डिसेम्बरबाट डाइभर्सिटी भिसा दिन सुरु गरिएकोमा उक्त महिना १३८ जना नेपालीले डाइभर्सिटी भिसा पाएका थिए । जनवरीमा ३३२ जनालाई डाइभर्सिटी भिसा दिइएको थियो भने फरबरीमा यो संख्या केही कम देखिएको थियो । फरबरीमा २८७ जना नेपालीहरुलेमात्र डाइभर्सिटी भिसा पाएका छन् ।
डिभी २०२३ का विजेताहरुले अक्टोबरदेखि भिसा पाउन सुरु गर्ने प्रावधान रहेतापनि अमेरिकी दूतावास काठमाडौंले अक्टोबर र नोभेम्बरमा कसैलाई पनि डाइभर्सिटी भिसा जारी गरेन ।
डिभी २०२३ मा ९५ लाख ७० हजार २ सय ९१ जना सहभागी भएका थिए । उनीहरुले २०२१ को अक्टोबर ६ देखि नोभेम्बर ९ सम्म डिभी लोटरी भरेका थिए ।