अप्रिलमा ६४६ लाई डाइभर्सिटी भिसा दिएको अमेरिकी दूतावास काठमाडौंबाट गत महिना जम्मा ५४ लाई डिभी
प्रकाशित मिति : असार ८, २०७९ बुधबार
अप्रिलमा ६४६ जनालाई डाइभर्सिटी भिसा दिएको अमेरिकी दूतावास काठमाडौंले गत महिना जम्मा ५४ जनालाईमात्र डाइभर्सिटी भिसा दिएको खुलासा भएको छ । अमेरिकी विदेशमन्त्रालयले आज सार्वजनिक गरेको तथ्यांक अनुशार मे महिनामा अमेरिकी दूतावास काठमाडौंले जम्मा ५४ जनालाई डाइभर्सिटी भिसा दिएको हो ।
मे महिनामा विश्वभरबाट जम्मा ५९ जना नेपालीहरुले डाइभर्सिटी भिसा पाएका छन् । मार्च र अप्रिलमा अमेरिकी दूतावास काठमाडौंले उल्लेख्य संख्यामा डाइभर्सिटी भिसा जारी गरेपछि मे महिनामा पनि यो क्रम जारी रहने अपेक्षा गरिएको थियो । तर मे महिनाको तथ्यांक भने डिभी विजेताहरुका लागि निराशाजनक रहेको छ ।
अप्रिल महिनामा अमेरिकी दूतावास काठमाडौंले ९८२ जनालाई आप्रवासी भिसा जारी गरेको थियो । त्यस्तै अप्रिलमा अमेरिकी दूतावास काठमाडौंले १७४३ जनालाई गैर आप्रवासी भिसा दिएको थियो, जसमध्ये भिजिटर भिसा पाउनेहरु १३४० जना थिए । तर मे महिनामा भने ४४७ जनालाईमात्र आप्रवासी भिसा जारी गरेको छ भने ३१७६ जनालाई गैरआप्रवासी भिसा जारी गरेको छ ।
डिभी २०२२ का विजेताहरुले अक्टोबरदेखि नै भिसा प्राप्त गर्नुपर्ने भएतापनि झण्डै साढे ५ महिनासम्म भिसा नदिएको अमेरिकाले मार्चको तेश्रोसातादेखि भिसा दिन सुरु गरेको हो । अक्टोबरदेखि मार्चको दोश्रोसातासम्म अमेरिकी दूतावास काठमाडौंले डिभी विजेताको अन्तरवार्ता समेत लिएको थिएन ।
मार्च २१ सोमबारदेखिमात्र डिभी विजेताहरुको अन्तरवार्ता लिन सुरु गरेको अमेरिकी दूतावासले जनाएको थियो । यद्यपी मार्चमा अमेरिकी दूतावास काठमाडौंले २९४ जना डिभी विजेताहरुलाई भिसा जारी गरेको थियो । अप्रिलमा अमेरिकी दूतावास काठमाडौंबाट ६ सय ४६ नेपालीले डाइभर्सिटी भिसा पाए ।
मार्चमा अन्य देशबाट भिसा पाउने र अमेरिकामा नै स्थीति समायोजन गर्नेहरुको समेत संख्या जोड्दा कुल भिसा प्राप्त गर्ने डिभी विजेता नेपालीहरुको संख्या भने ३ सय ४ रहेको थियो । अप्रिलमा यो संख्या ६ सय ६२ रहेको थियो ।
डिभी २०२२ का विजेताहरुले आगामी सेप्टेम्बरभित्र भिसा प्राप्त गरिसक्नुपर्ने प्रावधान रहेको छ ।
अमेरिकी विदेश मन्त्रालयका अनुशार आर्थिक बर्ष सन् २०२२ का लागि ३८०२ जना नेपालीहरुले डिभी लोटरी पारेका छन् । जुन एसियामा नै दोश्रो हो । एसियामा सबैभन्दा धेरै इरानका ५७३९ जनाले डिभी पारेका छन् ।
अमेरिकाले हरेकवर्ष डिभीबाट कति व्यक्ति अमेरिका आउन पाउने भन्ने कुराको निर्धारण गर्छ । गणना पूर्ण भइसकेपछि अमेरिको सरकारी निकायले त्यस्तो नम्बरको घोषणा गर्छ । तर कुनै पनि देशबाट कुल संख्याको ७ प्रतिशतभन्दा बढी व्यक्ति डाइभर्सिटी भिसामा अमेरिका आउन नपाउने नियम रहेको छ । जुन संख्या झण्डै ३८ सय हो ।