२०२० र २०२१ का डिभी विजेतालाई फाइदा गर्ने आदेशमाथिको पुनरावेदनमा मौखिक बहस सेप्टेम्बरमा
प्रकाशित मिति : चैत्र ७, २०७८ सोमबार
डिभी २०२० र २०२१ का डिभी विजेताका लागि भिसाहरु संरक्षण गर्नेगरी अमेरिकी डिस्ट्रिक्ट कोर्टका न्यायाधीश अमित मेहता र तान्या चुटकनद्वारा जारी गरिएका आदेशका सन्दर्भमा बाइडेन प्रशासनबाट गरिएका पुनरावेदनहरु एकीकृत गरिने भएको छ । वासिंटन डिसीको डिस्ट्रिक्ट कोर्टका लागि पुनरावेदन अदालतले बाइडेन प्रशासनका सबै अपिलहरु एकीकृत गर्ने आदेश दिएको हो ।
त्यस्तै यो मुद्दाबारे पुनरावेदन अदालतले तालिका समेत सार्वजनिक गरेको छ । जस अनुशार आगामी सेप्टेम्बरमा यसबारे मौखिक बहस हुने भएको छ । त्यो भन्दा अगाडि बादी प्रतिवादीहरुलाई यसबारे व्याख्याहरु पेश गर्ने मौका दिइएको छ । डिभीका सन्दर्भमा विभिन्न ४ वटा मुद्दाहरु अहिले अदालतमा विभिन्न चरणमा रहेका छन् ।
डिभी २०२० र २०२१ का डिभी विजेताका लागि अदालतले १७,४५६ भिसा संरक्षण गरेको छ । अमेरिकी सरकारको विदेश मन्त्रालयले डिभी २०२० र २०२१ का संरक्षित भिसाहरुबारे छिट्टै निर्देशिका जारी गर्ने बताएपनि यसबारे थप प्रकृया अगाडि बढाइएको छैन । डिभी २०२० र २०२१ का संरक्षित भिसा कसरी र कहिले प्रकृया अगाडि बढाउने भन्नेबारे सरकारले केही बताएको छैन ।
डिभी २०२० र २०२१ का सन्दर्भमा अदालतले भिसा संरक्षणका लागि विभिन्न समयमा विभिन्न आदेशहरु दिएको छ । विदेश मन्त्रालयले संरक्षित भिसाहरु आर्थिक बर्ष २०२३ भन्दा अगाडि जारी गर्न नसकिने बताउँदै आएको छ ।
गत अगस्त १७ मा वासिंटन डिसीको अदालतले डिभी २०२० का ९ हजार ९५ संरक्षित भिसाहरु जारी गर्न सरकारलाई आदेश दिएको थियो ।
त्यस्तै सेप्टेम्बर २७ मा वासिंटन डिसीको अदालतकै न्यायाधिसले कोरोना सम्बन्धित यात्रा प्रतिबन्धहरुका कारण भिसा पाउन नसकेका आर्थिक बर्ष २०२१ का डिभी विजेताहरुका लागि ९६६ भिसा संरक्षण गर्न आदेश दिएको थियो । त्यस्तै सेप्टेम्बर ३० मा दिइएको आदेशमा ६ हजार ९ सय १४ भिसा संरक्षणको आदेश दिइएको थियो । अर्को आदेशमा थप ४८१ भिसा संरक्षण गर्न र आर्थिक बर्ष २०२२ भित्र जारी गर्न आदेश दिइएको थियो ।
यसरी अदालतले डिभी २०२१ का कुल ८३६१ भिसा संरक्षण गर्न अमेरिकी सरकारलाई आदेश दिएको छ ।
डिभी २०२१ को भिसा जारी गर्ने डेडलाइन समाप्त हुने दिन वासिंटन डिसीको अदालतका न्यायाधिस अमित मेहताले भिसा संरक्षणको आदेश दिएका थिए ।
डिभी २०२१ का विजेताका लागि सन् २०२१ को सेप्टेम्बर ३० भित्र भिसा जारी गर्ने नियम भएपनि अदालतको आदेश पछि सरकारले आगामी दिनमा ८३६१ डिभी विजेताका लागि भिसा जारी गर्नुपर्नेछ ।
आर्थिक बर्ष २०२० मा कोरोना महामारी र ट्रम्पको कार्यकारी आदेशका बाबजुत १९ हजार १ सय २५ जना डिभी विजेताले भिसा पाउन र स्टाटस एड्जस्ट गर्न सफल भएको अमेरिकी सरकारको विदेश मन्त्रालयको तथ्यांक छ । थप ९ हजार ९५ भिसा संरक्षण गरिएको छ ।
सन् २०२१ का लागि डिभी विजेता नेपालीहरुको संख्या ३८०१ रहेको थियो । सन् २०२१ का डिभी विजेताहरुमा नेपाल एसियामा दोश्रो भएको थियो । गत आर्थिक बर्ष २०२० मा कोरोना महामारीका बाबजुत पनि २ हजार ८५ जना नेपालीहरुले डाइभर्सिटी भिसा पाउन वा स्टाटस एड्जस्ट गर्न सफल भएका थिए ।