३२ सयसम्म केस नम्बर हुने नेपाली डिभी विजेताको भिसा जनवरीमा करेन्ट
प्रकाशित मिति : कार्तिक ३०, २०७८ मंगलबार
आगामी जनवरीमा डिभी २०२२ का ३२ सयसम्म केस नम्बर हुने नेपाली विजेताहरुको भिसा करेन्ट हुने भएको छ । अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जारी गरेको भिसा बुलेटिन अनुशार जनवरीमा डाइभर्सिटी भिसा पाउन सक्ने नेपालीहरुको संख्या तोकिएको हो ।
डिसेम्बरमा २२ सयसम्म केस नम्बर हुने डिभी विजेता नेपालीहरुको भिसा करेन्ट हुनेछ । अर्थात् सबै प्रकृया पूरा भएको खण्डमा र सबै योग्यताका मापदण्ड पूरा गरेको खण्डमा उनीहरुले डिसेम्बरमा भिसा पाउन सक्नेछन् । यद्यपी कोरोना महामारीका कारण अमेरिकी दूतावास काठमाडौंले प्रयाप्त भिसा अप्वाइन्टमेन्टहरु उपलब्ध भने गराउन सकेको छैन ।
आर्थिक बर्ष सन् २०२२ का लागि गत मे ८ मा डिभी लोटरीको नतिजा सार्वजनिक गरिएको थियो । अमेरिकी विदेश मन्त्रालयका अनुशार आर्थिक बर्ष सन् २०२२ का लागि ३८०२ जना नेपालीहरुले डिभी लोटरी पारेका छन् । जुन एसियामा नै दोश्रो हो । एसियामा सबैभन्दा धेरै इरानका ५७३९ जनाले डिभी पारेका छन् ।
बढीमा ५५ हजार डिभी विजेताहरुले भिसा पाउनसक्ने भएतापनि १ लाख १९ हजार २१ जनाले सन् २०२२ को डिभी पारेका छन् । उनीहरुमध्ये कैयन अयोग्य हुनसक्ने भएकाले अमेरिकाले भिसा दिने नम्बरभन्दा धेरैलाई डिभी पार्दै आएको छ ।
सन् २०२२ का लागि कुल ७३ लाख ३६ हजार ३ सय २ जनाले डिभी भरेका थिए । आफन्तहरुसहित सन् २०२२ को डिभीमा सहभागी हुनेहरु विश्वभरबाट कुल १ करोड ३१ लख ९१ हजार २ सय ९६ जना रहेका थिए ।