डिभी २०२२ का विजेताहरुलाई भिसा सुरु, ९ सयसम्म केस नम्बर हुनेलाई अक्टोबरमा


प्रकाशित मिति : आश्विन १५, २०७८ शुक्रबार

आजदेखि डिभी २०२२ का विजेताहरुलाई अमेरिकाले भिसा दिन सुरु गरेको छ । अक्टोबर १ देखि आर्थिक बर्ष २०२२ सुरु भएकाले डिभी २०२२ का विजेताहरुलाई भिसा दिन सुरु गरिएको हो । अक्टोबर महिनाका लागि नेपालीकाहरुका सन्दर्भमा ९ सय भन्दा माथि केसनम्बरमा सिमाबन्दी लगाईको छ ।

नोभेम्बरमा नेपालीका सन्दर्भमा १७ सयभन्दा माथि केस नम्बरमा सिमाबन्दी लगाइएको छ । डिभी २०२२ का विजेताहरुले सन् २०२३ को सेप्टेम्बर ३० सम्म भिसा पाउनसक्ने प्रावधान रहेको छ ।

आर्थिक बर्ष सन् २०२२ का लागि गत मे ८ मा डिभी लोटरीको नतिजा सार्वजनिक गरिएको थियो । अमेरिकी विदेश मन्त्रालयका अनुशार आर्थिक बर्ष सन् २०२२ का लागि ३८०२ जना नेपालीहरुले डिभी लोटरी पारेका छन् । जुन एसियामा नै दोश्रो हो । एसियामा सबैभन्दा धेरै इरानका ५७३९ जनाले डिभी पारेका छन् ।

बढीमा ५५ हजार डिभी विजेताहरुले भिसा पाउनसक्ने भएतापनि १ लाख १९ हजार २१ जनाले सन् २०२२ को डिभी पारेका छन् । उनीहरुमध्ये कैयन अयोग्य हुनसक्ने भएकाले अमेरिकाले भिसा दिने नम्बरभन्दा धेरैलाई डिभी पार्दै आएको छ ।

सन् २०२२ का लागि कुल ७३ लाख ३६ हजार ३ सय २ जनाले डिभी भरेका थिए । आफन्तहरुसहित सन् २०२२ को डिभीमा सहभागी हुनेहरु विश्वभरबाट कुल १ करोड ३१ लख ९१ हजार २ सय ९६ जना रहेका थिए ।

चालु आर्थिक बर्ष २०२१ का लागि पनि ३८०१ जना नेपालीहरुले डिभी लोटरी पारेका थिए । तर कोरोना महामारी र विगतको ट्रम्पको आप्रवासन रोकका कारण अधिकांशले भिसा पाउन सकेनन् । सेप्टेम्बर ३० भित्र भिसा पाउन नसकेका केही डिभी विजेताहरुका लागि पछि समेत भिसा पाउन सक्नेगरी अदालतले भिसा संरक्षण गरेको छ ।

अमेरिकी दूतावास काठमाडौं

अदालतले डिभी २०२१ का कुल ८३६१ भिसा संरक्षण गर्न अमेरिकी सरकारलाई आदेश दिएको हो । गुड लक भर्सेस बाइडेन मुद्दामा अदालतले ६९१४ विजेताका भिसा संरक्षण गर्न अमेरिकी सरकारलाई आदेश दिएको छ भने अरु थप दुई वटा आदेशमा ४८१ र ९६६ भिसा संरक्षणको आदेश दिइएको हो ।

वासिंटन डिसीको अदालतका न्यायाधिस अमित मेहताले भिसा संरक्षणको आदेश दिएका हुन् । डिभी २०२१ का विजेताका लागि सन् २०२१ को सेप्टेम्बर ३० भित्र भिसा जारी गर्ने नियम भएपनि अदालतको आदेश पछि सरकारले आगामी दिनमा ८३६१ डिभी विजेताका लागि भिसा जारी गर्नुपर्नेछ ।

मेहताले कुल डिभी २०२१ का लागि ७ हजार ३ सय ९५ भिसा संरक्षणको आदेश दिएका हुन् । यसै साताको सुरुमा न्यायाधिस तान्या चुटकानले २०२१ का डिभी विजेताका लागि थप ९६६ भिसा संरक्षणको आदेश दिएकी थिइन् ।

चुटकान र मेहताले गरी डिभी २०२१ का कुल ८ हजार ३ सय ६१ भिसा संरक्षणको आदेश दिएका छन् । यी भिसाहरु कहिलेदेखि जारी गर्न सुरु गर्ने भन्नेबारे अदालतले केही बताएको छैन ।

बुधबार अदालतमा सरकारका तर्फबाट गरिएको फाइलिङमा सेप्टेम्बर २६ सम्म आर्थिक बर्ष २०२१ का १५ हजार १ जनालाई डाइभर्सिटी भिसा जारी गरिएको जनाइएको थियो ।

अमेरिकी विदेश मन्त्रालयले १८ हजार ७ सय ३१ आवेदन प्रकृयामा लगेकोमा ३७ सय ३० आवेदन अस्वीकृत भएको र १५ हजार १ जनालाई भिसा जारी गरिएको सरकारी रेकर्डमा उल्लेख छ । त्यसपछिका ४ दिनमा पनि डाइभर्सिटी भिसा जारी गरिएको छ तर कतिजनालाई जारी गरियो भन्नेबारेको रेकर्ड भने अझै सार्वजनिक गरिएको छैन ।

त्यस्तै केन्टकी कन्सुलर सेन्टरका निर्देशकका तर्फबाट अदालतमा पेश गरिएको विवरणमा डिभी २०२१ का विजेताहरुमध्ये ५० हजार ७ सय ५६ जनाबाट केन्टकी कन्सुलर सेन्टरले डीएस २६० अर्थात् आप्रवासी भिसा आवेदन प्राप्त गरेको उल्लेख गरिएको छ । तर जम्मा लाभग्राहीहरु कतिजना छन् भन्नेबारे आफूहरुले बताउन नसक्ने अदालतमा पेश गरिएको कागजातमा उल्लेख छ ।

अहिलेसम्मको विवरण हेर्दा कोरोना महामारी र विभिन्न कानूनी दाउपेचकाबीच डिभी २०२१ का विजेताहरुलाई इतिहासमा नै सबैभन्दा कम भिसा जारी गरिएको छ । गत आर्थिक बर्ष २०२० मा कोरोना महामारी र ट्रम्पको कार्यकारी आदेशका बाबजुत १९ हजार १ सय २५ जना डिभी विजेताले भिसा पाउन र स्टाटस एड्जस्ट गर्न सफल भएको अमेरिकी सरकारको विदेश मन्त्रालयको तथ्यांक छ । थप ९ हजार ९५ भिसा संरक्षण गरिएको छ ।

गत आर्थिक बर्ष २०२० मा कोरोना महामारीका बाबजुत पनि २ हजार ८५ जना नेपालीहरुले डाइभर्सिटी भिसा पाउन वा स्टाटस एड्जस्ट गर्न सफल भएका थिए । त्यो भन्दा अगाडि आर्थिक बर्ष २०१९ मा २७९५, आर्थिक बर्ष २०१८ मा ३३०७, आर्थिक बर्ष २०१७ मा ३४७७ र आर्थिक बर्ष २०१६ मा ३२४७ जना नेपालीहरुले डाइभर्सिटी भिसा पाउन वा डाइभर्सिटी भिसामार्फत स्टाटस एड्जस्ट गर्न सफल भएका थिए ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com