जुन महिनालाई विश्वभर गौरव महिनाका रुपमा मनाइदै, लण्डनबाट ब्लगर लिम्बुको ‘गौरव’ भिडियो
प्रकाशित मिति : जेष्ठ १८, २०७८ मंगलबार
जुन महिनालाई समयौनिक, तेश्रो लिंगी तथा लैंगिक अल्पसंख्यकहरुको गौरवको महिनाका रुपमा मनाउनका लागि विश्वभर महिनाभर नै विभिन्न कार्यक्रमहरु आयोजना गरिने भएको छ । ‘तपाई समावेश हुनुहुन्छ’ भन्ने सन्देशसहित अमेरिकाले गौरवको महिना मनाउने अमेरिकी विदेशमन्त्री एन्टोनी ब्लींकेनले आज जारी सन्देशमा जनाएका छन् ।
अमेरिकी विदेश मन्त्रालय समुदायको विविध अनुभव, दृष्टिकोण र योगदानले अमेरिकी विदेशमन्त्रालयलाई अझ बलियो बनाउने र अमेरिकी कुटनीतिको लक्ष्यमा अझ अगाडि बढाउने उल्लेख गर्दै ब्लींकेनले भनेका छन् – ‘हामीमा विविधतामा एकता छ ।’
समयौनिक, तेश्रो लिंगी तथा लैंगिक अल्पसंख्यकहरुको मानवअधिकारको विषयमा आफ्नो सहभागिता बढाउन विदेशमन्त्रालय प्रतिबद्ध रहेको उनले बताएका छन् । विश्वमा यो समुदायका व्यक्तिले हिंशा, विभेद र उत्पीडनहरु भोग्नु परेको उल्लेख गर्दै ब्लींकेनले अझै धेरै काम गर्न बाँकी रहेको बताएका छन् ।
विश्वभरका अमेरिकी दूतावास र कन्सुलेटहरुलाई इन्द्रेणी झण्डा फहराउन अनुमति
यो बर्ष अमेरिकी विदेश मन्त्रालयले विश्वभरका अमेरिकी दूतावास र कन्सुलेटहरुलाई अमेरिकन झण्डाकै पोलमा समयौनिक र तेश्रो लिंगी लगायत लैंगिक अल्पसंख्यकलाई प्रतिनिधित्व गर्नेगरी गौरवको इन्द्रेणी झण्डा फहराउन अनुमति दिइसकेको छ । ट्रम्प प्रशासनले अमेरिकी दूतावास र कन्सुलेटलाई लैंगिक अल्पसंख्यकलाई प्रतिनिधित्व गर्नेगरी गौरवको इन्द्रेणी झण्डा फहराउन रोक लगाएको थियो ।
जुन महिनामा अब विश्वभरका अमेरिकी दूतावास र कन्सुलेटहरुले इन्द्रेणी झण्डा फहराउन सक्ने भएका छन् । तर फहराउन नचाहने अमेरिकी दूतावास र कन्सुलेटले आफ्नो निर्णय समेत गर्नसक्ने जनाइएको छ ।
ट्रम्प प्रशासनका पालामा तत्कालिन अमेरिकी विदेशमन्त्री माइक पम्पिओले अमेरिकी झण्डाका साथमा त्यही पोलमा अर्को कुनै झण्डा अस्थायी रुपमा राख्नमा समेत रोक लगाएका थिए । ब्लींकेनले आफ्नो नियुक्तीको सुनुवाईकै क्रममा गौरवको झण्डा नीतिलाई परिवर्तन गर्ने प्रतिबद्धता जनाएका थिए ।
ट्रम्प प्रशासनले अनुमति नदिएपनि केही अमेरिकी दूतावास र कन्सुलेटहरुले सन् २०१९ मा गौरवको महिना अवधिभर इन्द्रेणी झण्डा फहराएका थिए ।
ब्लगर लेक्स लिम्बुबाट गौरव भिडियो सार्वजनिक
युके निवासी नेपाली ब्लगर लेक्स लिम्बुले जुन १ तारिखमा मा आफ्नो नयाँ भिडियो गौरव सार्वजनिक गरेका छन् । गौरव महिना विश्वभरका सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरुको उत्सवप्रति समर्पित छ । लिम्बु र अविस्कार राई अभिनित भिडियोमा दुईजना समयौनिक पुरुषहरुबीचको प्रेमलाई दर्शाइएको छ भने विशेष उपस्थीतिका रुपमा लिम्बुका आफ्नै बुबाआमालाई समेत देख्न सकिन्छ ।
विज्ञापन शैलीको उक्त छोटो भिडियोको निर्देशन रामुना पुनले गरेका हुन् भने सुसान्त विष्टको साउण्डट्रयाक म तिम्रोको समेत मिश्रण रहेको छ । यो भिडियोको छायांकन युकेको ह्याम्पशायरमा चाउटन भिलेजमा गरिएको हो । लिम्बुले सन् २०१८ मा एउटा युट्युब भिडियो सार्वजनिक गर्दै आफ्नो यौन झुकावबारे सार्वजनिक गरेका थिए ।
लिम्बु भन्छन् – ‘सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरुका प्रति र अहिलेसम्मको हाम्रा यात्राप्रति ध्यान केन्द्रीत गर्न गौरवको महिना उत्तम तरिका हो । जब तपाई आफू जो हो त्यसमा गर्व गर्न सक्नुहुन्छ, त्यो कति सुन्दर हुनसक्छ भन्ने यो छोटो भिडियोमार्फत मैले सार्वजनिक गर्न चाहेको हुँ । यद्यपी सुरुमा मैले मेरो भिडियोसँगै देखापर्ने व्यक्ति खोज्नका लागि संघर्ष गर्नुपरेको थियो । आविस्कार यो परियोजनाका लागि आउँदा म ढुक्क भएँ ।’
निर्देशक रामुना आफ्नो अनुभव बाड्दै भन्छिन् – ‘जब लेक्सले यो भिडियो गौरवका लागि मसँग सम्पर्क गरे, तब म कथाको सरलताबाट तुरुन्तै आकर्षिक भएँ । व्यापक सन्दर्भमा यसको वजन निकै भारी थियो । तर चारैजना पात्रहरुबीच साटासाट गरिएको भावनाको तरलता वास्तविक, विश्वसनीय, कच्चा र सबैकुरा सरल बनाउने खालको छ । मैले यो कथालाई प्रेमका साथ बुझें र छायांकन गरें । म सबैले यो कथालाई यसैगरी स्वीकार गर्ने अपेक्षा गर्दछु । मेरा लागि गौरव भनेको तपाई आफू जो हो त्यही हुने र तपाईले जे चाहेको यो उसलाई प्रेम गर्ने धारणा हो । न त धेरै, न त अरु कुनै ।’
भिडियोमा गौरवको रुपमा अभिनय गरेका आविस्कार आफ्नो अनुभव बाड्दै भन्छन् – ‘गौरव को महिना ले पहिले तपाई आफैमा को हो भन्ने स्वीकारोक्तिलाई प्रतिनिधित्व गर्छ । साथै तपाईमात्र एक्लो हुनुहुन्न भन्ने महसुस गराउने चीजलाई प्रतिनिधित्व गर्छ । तपाई भन्न सक्नुहुन्छ कि किन मैले यो भिडियोमा काम गरें? यद्यपी नेपाली समुदायमा सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरुलाई सचेत बनाइएको छ तर मेरो विचारमा यो अझै पनि संवेदनशील विषय हो । यो भिडियो बनाएर र यसरी प्रस्तुत गरेर यसले मान्छेको सोंचमा विस्तारै परिवर्तन ल्याउने र मान्छेहरुलाई यसविषयमा अझ बढी सहज बनाउने आशा छ ।’
के हो गौरव महिना ?
अमेरिका बाहिरका धेरै मानिसका लागि समयौनिक व्यक्तिहरुको अधिकारहरु परिवर्तन गर्न सफल प्रदर्शनका रुपमा परिचित स्टोनवाल विद्रोह भएको महिना जुन महिनालाई गौरवको महिनाका रुपमा छानिएको हो । सन् १९६९ को जुन २८ मा न्युयोर्क सिटीमा रहेको स्टोनवाल इनमा भएको प्रहरी हमलाको बिरुद्ध समयौनिक, तेश्रोलिंगी र लैंगिक अल्पसंख्यक समुदायले बिद्रोह गरेका थिए ।
पछिल्ला बर्षहरुमा जुन महिनाको दोस्रो शनिबारलाई नेपाल गौरव यात्राका रुपमा मनाइदै आएको छ । सन् २०१९ देखि गौरव यात्रा काठमाडौँमा मनाइदै आएको छ।
यसपटक गौरव मार्चहरु अधिकांश भर्चुअल रुपमा हुने भएका छन् । न्युयोर्क सिटीमा पनि गौरव महिनाको अवशरमा भर्चुअल र्याली हुने भएको छ ।