अमेरिकी विदेशमन्त्रालयको प्रतिष्ठित अवार्ड नेपाली महिला मुस्कान खातुनलाई
प्रकाशित मिति : फाल्गुन २०, २०७७ बिहीबार
एसिड आक्रमणमा परेर बाँचेकी नेपाली महिला मुस्कान खातुनलाई अमेरिकी सरकारले प्रतिष्ठित अन्तर्राष्ट्रिय साहसी महिला अवार्ड प्रदान गर्ने भएको छ । एसिड आक्रमण अन्त्यका लागि खातुनको कामको सम्मान गर्दै अमेरिकी सरकारले यो अवार्ड प्रदान गर्न लागेको हो ।
८ मार्चमा अमेरिकी विदेशमन्त्री एन्टोनी ब्लींकेनले विश्वभरका अवार्ड विजेता महिलाहरुको सम्मानमा विशेष भर्चुअल समारोहको आयोजना गर्ने भएका छन् । जसमा अमेरिकी प्रथम महिला जिल बाइडेनले विशेष सम्बोधन गर्ने कार्यक्रम रहेको छ । उक्त समारोहमा शान्ति, न्याय, मानव अधिकार, लैङ्गिक समानता, र महिला सशक्तीकरणको वकालत गर्ने असाधारण साहस र नेतृत्व प्रदर्शन गरेका विश्वभरका १४ जना महिलाहरुलाई यो अवार्ड प्रदान गरिनेछ ।
साथै अफगानिस्तानमा समुदायको सेवामा खटिएको बेला सन् २०२० मा भएको हमलामा मारिएका ७ जना महिलाको सम्मानमा सम्मान अवार्ड समेत प्रदान गरिने भएको छ । कार्यक्रम अमेरिकी विदेशमन्त्रालयको वेवसाइटबाट समेत प्रत्यक्ष प्रशारण गरिनेछ ।
यो अवार्ड पाउने मुस्कान खातुन सन् २०१९ मा १५ वर्षकी छँदा एक किशोरको प्रेम प्रस्ताव अस्वीकार गरेकोमा एसिड हमलाको सिकार भएकी थिइन् । उनको अनुहार, छाती र हातमा गहिरो चोट लागेको थियो।
यसका बाबजुद मुस्कानले एक दुखद घटनालाई नेपालमा परिवर्तन ल्याउने एक अवसरमा रूपान्तरण गरिन् । धम्की र सामाजिक दबाबको सामना गर्दै मुस्कानले एसिड हमलाविरुद्ध कडा कानुन र सजायको लागि अभियान संचालन गरिन् । उनले प्रधानमन्त्री केपी ओलीसँग भेटेर एसिड हमलासम्बन्धी नयाँ कानुनको मस्यौदा तयार पार्न आह्वान गरेकी थिइन् । त्यसपछि सरकारले अपराधीहरूलाई दण्डित गर्ने तथा रसायनको बिक्रीलाई नियमन गर्ने अध्यादेश जारी गरेको थियो ।
Drumroll please! धेरै-धेरै बधाई। I’m absolutely thrilled to announce tht Nepal’s Muskan Khatun will be receiving the @StateDept’s International Women of Courage Award for her work to end acid attacks. She’ll be the 1st Nepali to win & 1⃣of the youngest awardees ever!? #IWOC2021 pic.twitter.com/gdbO0a4aEq
— Ambassador Randy Berry (@USAmbNepal) March 5, 2021
यो परिवर्तन ल्याउनमा मुस्कानको नेतृत्व महत्त्वपूर्ण रहेको भन्दै नेपालस्थित अमेरिकी दूतावासले उनलाई समर्थन गर्नमा गर्व गर्ने तथा नेपालमा महिला तथा किशोरीहरूको अधिकारको प्रगतिलाई प्रोत्साहन गर्नमा गर्व गर्ने बताएको छ ।
अहिलेसम्म अमेरिकाले १५ बर्षमा ७५ वटा देशबाट १५५ जनालाई यो अवार्ड प्रदान गरिसकेको छ । विदेशमा रहेका अमेरिकी कूटनीतिक नियोगहरुले एकएकवटा नाम नोमिनेशनका लागि पठाएपछि ती नामहरुबाट अमेरिकी विदेश मन्त्रालयका बरिष्ठ अधिकारीहरुबाट अवार्ड प्राप्त गर्नेहरुको छनौट गर्छन् ।
अवार्ड पाउने विश्वभरका महिलाहरुको सुची यहाँ हेर्नुहोला ।
यो आईडब्ल्यूओसी पुरस्कार समारोह नेपाली समय अनुशार फागुन २४ गते सोमबार राती साढे ८ बजे अमेरिकी दूतावास काठमाडौंको फेसबुक पेजमा हेर्न सकिनेछ ।