छिमेकीहरुलाई ७५ लाख डलर छाडेर गइन् जर्मन महिला रेनाटा वीडल
प्रकाशित मिति : मंसिर १९, २०७७ शुक्रबार
जर्मन महिला रेनाटा वीडलले मृत्यु हुनु अगाडि आफ्नो झण्डै ६२ लाख युरो अर्थात् झण्डै ७५ लाख डलरको सम्पत्ति र स्टक पोर्टफोलियो छिमेकीहरुलाई छाडेकी छिन् । उनले यो सम्पत्ति मध्य जर्मनीका आफ्ना समुदायका नाममा छाडेर गएकी हुन् ।
वीडल सन् १९७५ देखि आफ्ना पति अल्फ्रेडका साथमा हेसको वाइपरफिल्डेन डिस्ट्रिक्टमा बस्दै आएकी थिइन् । स्टक मार्केटमा निकै सकृय अल्फ्रेडको सन् २०१४ मा निधन भएको थियो । त्यसपछि सन् २०१६ देखि रेनाटा वीडल जर्मनीको फ्रयांकफर्टमा नर्सिङ होममा बस्दै आएकी थिइन् । उनको गतबर्षको डिसेम्बरमा ८१ बर्षको उमेरमा निधन भएको थियो ।
वाइपरफिल्डेन डिस्ट्रिक्टलाई उनको इच्छापत्रमा सबै सम्पत्ति समुदायका नाममा गराइएको जानकारी दिइएको थियो । रेनाटा वीडलकी बहिनी सम्पत्तिको पहिलो उत्तराधिकारी भएपनि उनको समेत पहिले नै निधन भइसकेकाले सम्पत्ति समुदायका नाममा दिइएको हो । सुरुमा त उनले मृत्यु अगाडि आफ्नो सम्पत्ति समुदायका नाममा दिएको कुरा विश्वासै नलागेको त्यहाँका मेयरले बताएका छन् ।
अब उक्त सम्पत्ति सामुदायिक सुविधा र हितका लागि प्रयोग गरिने भएको छ । वीडल दम्पत्तिको सम्मान हुनेगरी जिम्मेबारीका साथ समुदायका लागि राम्रो कुराको विकाशमा लगाइने वक्तब्यमा जनाइएको छ । स्थानीय बासिन्दाले उक्त रकम साइकलका लागि बाटो, किण्डरगार्टेन, सार्वजनिक यातायात, बालबालिकाका लागि भवन लगाउन सुझाव दिएका छन् ।