सेप्टेम्बरमा भिसा पाएका डिभी विजेता नेपालीलाई एयरपोर्टबाट फर्काइदै, डिसेम्बरपछि आउन पाउने
प्रकाशित मिति : आश्विन २९, २०७७ बिहीबार
सेप्टेम्बरका डाइभर्सिटी भिसा पाएका केही नेपालीहरु अक्टोबरमा नै अमेरिका आउन खोज्दा काठमाडौं विमानस्थलबाट नै फर्काइएका छन् । अमेरिकी राष्ट्रपति डोनाल्ड ट्रम्पको कार्यकारी आदेश डिसेम्बर ३१ सम्म नै लागु हुने भएकाले अप्रिल २३ पछि नयाँ भिसा पाएका डिभीवाहकहरु डिसेम्बर ३१ अगाडि नै अमेरिका आउन नसक्ने प्रावधान छ ।
तर अप्रिल २३ भन्दा अगाडि नै डाइभर्सिटी भिसा पाएकाहरु वा अप्रिल २३ भन्दा अगाडि नै भिसा पाएर भिसाको अवधि सकिएर पुन नविकरण गरेकाहरु भने डिसेम्बर अगाडि पनि आउनसक्ने जनाइएको छ । अमेरिकी राष्ट्रपति डोनाल्ड ट्रम्पको कार्यकारी आदेशले डिभी २०२० का विजेताहरुलाई भिसा पाउनमा रोक लगाएपनि अदालतको आदेशपछि सेप्टेम्बरमा केही डिभी विजेताहरुलाई भिसा जारी गरिएको थियो ।
सेप्टेम्बरमा आफूहरुले डिभी २०२० का नेपाली विजेताहरुलाई सकेजति भिसा जारी गरेको अमेरिकी दूतावास काठमाडौंले जनाएको छ । तर अपवादमा परेकोबाहेक अन्य डिभी विजेताहरु डिसेम्बर ३१, २०२० भन्दा अगाडि अमेरिका आउन नसक्ने अमेरिकी सरकारको विदेश मन्त्रालयले स्पष्ट पारेको छ ।
सामान्यतया मेडिकल जाँचको प्रमाणपत्रको म्याद सकिंदा नै ६ महिने आप्रवासी भिसाको म्याद सकिने भएकाले दूतावासले भिसा जारी गर्नु अगाडि नयाँ मेडिकल जाँचको प्रमाणपत्र प्रदान गर्न विकल्प दिएको थियो । सेप्टेम्बरमा जसजसले डाइभर्सिटी भिसा पाएका छन्, वर्तमान अवस्था अनुशार उनीहरु जनवरीमा यात्रा गर्नसक्नेछन् । सामान्यतया उनीहरुको भिसा मार्च सम्म नै अद्यावधिक हुन्छ ।
ट्रम्पको कार्यकारी आदेशपछि जारी भएका तर डिसेम्बर ३० अगाडि नै म्याद सकिने २०२० का भिसा भएका डिभी विजेताहरु अपवादमा नपरेको खण्डमा अमेरिका आउनसक्ने छैनन् । सन् २०२० को डिभी जारी गर्ने म्याद सेप्टेम्बर ३० मा नै समाप्त भइसकेको छ । २०२१ का डिभी विजतालेहरुले आगामी जनवरीपछि भिसा पाउन सक्नेछन् ।
नियमित भिसा सेवाका लागि दूतावास अझै पनि बन्द रहेको दूतावासले जनाएको छ । आफूहरुले अझै पनि रिटर्निंग रेसिडेन्स भिसा प्रकृयामा लैजान नसकेको दूतावासको भनाई छ । ग्रिनकार्डमा नेपालमा गएर महामारीका कारण १ बर्षभित्र फर्कन नसकेका र २ बर्षको ट्राभल डकुमेन्टमा नेपाल गएर सोही अवधिभित्र अमेरिका फर्कन नसकेकाहरुले यो भिसाका लागि आवेदन दिनसक्ने प्रावधान रहेको छ ।
विद्यार्थी र भिजिटर भिसाका आवेदनहरु पनि प्रकृयामा लैजान नसकेको दूतावासले जनाएको छ । कहिले खुल्छ भन्ने अहिले नै भन्न नसकिने तर त्यसबारेमा अपडेट गर्दै जाने दूतावासको भनाई छ । नियमित भिसा सेवा संचालनका लागि अन्य कैयन महिना लाग्ने दूतावासले जनाएको छ ।
अमेरिकी सरकारको डिपार्टमेन्ट अफ स्टेट ब्यूरो अफ कन्सुलर अफेयर्सले सन् २०२१ का लागि डिभी विजेता नेपालीहरुको संख्या ३८०१ रहेको जनाएको छ ।
उनीहरुले गत अक्टोबरको २ देखि नोभेम्बर ५ सम्म डिभी लोटरी भरेका थिए । गत जुन ६ मा डिभी लोटरीको नतिजा आएको थियो ।
सन् २०२१ का डिभी विजेताहरुमा नेपाल एसियामा दोश्रो रहेको छ । सबैभन्दा धेरै डिभी विजेताहरु इरानका ६ हजार १ जना रहेका छन् । सन् २०२१ का लागि विश्वमै सबैभन्दा धेरै डिभी विजेताहरु भने इजिप्टका ६ हजार २ जना रहेका छन् । त्यस्तै अल्जेरियाका ६ हजार १ जना र सुडानका ६ हजार १ जना रहेका छन् ।
युरोपमा भने रसियाका ६ हजार १, युक्रेनका ५६ सय ०४ र अल्बानियाका ३९ सय ६२ जनाले डिभी लोटरी पारेका छन् । रोचक त के छ भने इरान, अल्जेरिया, सुडान र रसियाका नागरिकलाई एउटै संख्यामा अर्थात् हरेक देशका ६ हजार १ लाई डिभी लोटरी परेको छ ।
सन् २०२१ का लागि नर्थ कोरियाका ३ जनालाई डिभी लोटरी परेको छ । बु्रनाईका १ जनालाई डिभी परेको छ भने एकजनालाईमात्र डिभी लोटरी परेका अन्य देशहरु झण्डै आधादर्जन छन् ।