विश्वभरका ४ दर्जनलाई उछिन्दै गोठालोको जीवनमा आधारित नेपाली डकुड्रामा अमेरिकामा उत्कृष्ट
प्रकाशित मिति : भाद्र १८, २०७७ बिहीबार
हिमाली क्षेत्रको भेडी गोठालोको जनजीवनमा आधारित वृत्तचित्र फिल्म अ डे इन द लाइफ अफ हिमालयन सेफर्ड अमेरिकाको सिकागोमा आयोजित चलचित्र महोत्सवमा ‘आलदेरी अवार्ड’ जित्नुका साथै बेष्ट डकुमेन्ट्री सर्ट फिल्म बन्न सफल भएको छ ।
अगष्ट २८ र २९ तारिखसम्म चलेको आलदारी अन्तर्राष्ट्रिय चलचित्र महोत्सवमा बेष्ट डकुमेन्ट्री सर्ट फिल्म घोषणा गरिएको थियो । उक्त महोत्सवमा झण्डै ४ दर्जन बृत्तचित्र, छोटा चलचित्र र म्युजिक भिडियोहरु नोमिनेशनमा परेका थिए ।
उत्कृष्ट ८ मा पुगेकाहरुबाट यो डकुड्रामा सर्वोत्कृष्ट भएको हो ।
उक्त डकुड्रामाको निर्देशक मानछिरिङ तामाङले गरेका हुन् ।
अब उक्त डकुड्रामा लसएन्जलसको चलचित्र महोत्सवमा एक हप्तासम्म प्रदर्शन हुनेछ ।
पत्रकारिता क्षेत्रमा समेत सकृय तामाङले धादिङ जिल्लाको रुबी भ्यालीभेगको भेडापालनलाई आधार बनाएर २० मिनेटको डकुड्रामा बनाएका हुन् ।
धादिङको सेर्तुङका ४५ वर्षीय खरिमान तामाङको दैनिकीलाई छायांकन गरिएको छ, जो आफ्ना हजुरबुबा र बाबुको पदचिह्न पछ्याउँदै भेडापालनमा जीवन समर्पित गरिरहेका छन् ।
यसअघि पनि उनको छोटोचलचित्र अमेरिकाको न्युजर्सीमा भएको नेवार्क सर्ट फिल्म फेस्टिभलमा उत्कृष्ट घोषणा भएको थियो ।
डकुड्रामा अमेरिका, बेलायत, अष्ट्रेलिया लगायतका देशमा भएमा आधादर्जन महोत्सवमा प्रदर्शन भइसकेको छ ।