अप्रिलमा १० हजार ५ सयसम्म केस नम्बर हुने डिभी विजेता नेपालीलाई ग्रिनकार्ड
प्रकाशित मिति : फाल्गुन ६, २०७६ मंगलबार
आगामी अप्रिल महिनाका लागि डिभी लोटरी मार्फत भिसा पाउने नेपालीहरुको केस नम्बर सार्वजनिक गरिएको छ । अमेरिकी सरकारले आज जारी गरेको भिसा बुलेटिन अनुशार आगामी अप्रिलमा १० हजार ५ सयसम्म केस नम्बर हुने डिभी विजेता नेपालीलाइ भिसा प्रदान गरिने भएको छ ।
फरबरीमा ७५ सय ७५ सम्म केस नम्बर हुने र मार्चमा ८ हजार ८ सयसम्म केस नम्बर हुने नेपालीहरुले भिसा प्राप्त गर्नेछन् ।
आर्थिक बर्ष सन् २०२० का लागि डिभी लोटरी विजेताहरुले गत अक्टोबर १ देखि भिसा पाउन सुरु गरिसकेका छन् । अक्टोबर महिनाका लागि १ हजारसम्म केस नम्बर हुने नेपालीहरुलेमात्र भिसाको प्रकृया अगाडि बढाउन सक्नेगरी सिमाबन्दी तोकिएको थियो ।
तर नोभेम्बर महिनामा भने ३१ सय सम्म केस नम्बर हुने नेपाली डिभी विजेताको भिसा प्रकृया अगाडि बढाइयो । डिसेम्बर महिनामा ५ हजारसम्म केस नम्बर हुने नेपाली डिभी विजेताको भिसा प्रकृया अगाडि बढाइयो भने जनवरीमा ६५ सयसम्म केस नम्बर हुने नेपालीले भिसा पाए ।
गत बर्षको अक्टोबरमा डिभी लोटरी भरेकाहरुले यो अक्टोबरबाट भिसा पाउन सुरु गरेका हुन् । उनीहरुले सन् २०२० को सेप्टेम्बर अन्त्यसम्म भिसा पाउनेछन् । त्यतीन्जेलसम्म भिसा नपाउनेहरु अमेरिका जानका लागि स्वत अयोग्य हुनेछन् ।
यसपटक नोभेम्बर ५ सम्म डिभी लोटरी भरिरहेकाहरुले आगामी मे ५ मा नजिता प्राप्त गर्नेछन् । उनीहरुले आगामी अक्टोबर १ देखि भिसा पाउन सुरु गर्नेछन् । यसबर्षदेखि डिभी लोटरी भर्नका लागि पासपोर्ट अनिवार्य गरिएको छ ।
