अमेरिका र युरोपेली संघ बीच नयाँ व्यापार सम्झौता, इयुले अमेरिका भित्र ६०० बिलियन डलर लगानी गर्ने
प्रकाशित मिति : श्रावण ११, २०८२ आईतबार
अमेरिका र युरोपेली संघ इयु बीच नयाँ व्यापार सम्झौता भएको छ । महिनौँदेखिको व्यापार विवाद अन्त्य गर्दै दुइ देशकाबीचमा नयाँ व्यापार सम्झौता भएको हो ।
अत्यन्त संवेदनशील वार्तापछि अमेरिकी राष्ट्रपति डोनाल्ड ट्रम्प र युरोपेली आयोगकी अध्यक्ष उर्सुला फन डर लायनबीच स्कटल्याण्डको टर्नबेरी गोल्फ क्लबमा सम्झौता भएको हो।
सम्झौता अनुसार अब अमेरिकाले इयु बाट आयात हुने सबै वस्तुहरूमा १५ प्रतिशत शुल्क लगाउनेछ ।
यो शुल्क दर पहिले ट्रम्पले घोषणा गरेको ३० प्रतिशत भन्दा आधा हो । बदलामा, इयु ले केही अमेरिकी उत्पादनहरूमा शून्य प्रतिशत शुल्कमा पहुँच दिने वाचा गरेको छ ।
फन डर लायनले सम्झौतालाई ूस्थिरता ल्याउने महत्वपूर्ण कदमू भन्दै स्वागत गरिन् । उनका अनुसार अमेरिका र इयु सँगै विश्व व्यापारको झण्डै एक तिहाइ हिस्सा ओगटेका छन् । ट्रम्पले आफ्नो ‘व्यापार घाटा घटाउने’ रणनीतिअन्तर्गत यस्ता सम्झौता गर्दै आएका छन् ।
यसअघि उनले बेलायत, जापान, इन्डोनेसिया, फिलिपिन्स र भियतनामसँग पनि व्यापार सहमति गरेका थिए । यद्यपि उनले घोषणा गरेको ९० दिनमा ९० सम्झौता लक्ष्य भने पूरा भएको छैन ।
टर्नबेरीमा दुई नेताबीचको गोप्य वार्तापछि ट्रम्पले भने, “यो सबैका लागि राम्रो सम्झौता हो । अब हामी अझ नजिक हुनेछौँ।”
फन डर लायनले यसलाई “विशाल सम्झौता” बताउँदै भनिन्, “वार्ता कठिन थियो तर हामी सफल भयौं।” इयु ले अमेरिका भित्र ६०० बिलियन डलर लगानी गर्नेछ । जसमा सैन्य उपकरण खरिद पनि समावेश रहेको सम्झौतामा उल्लेख छ ।
ऊर्जा क्षेत्रमा ७५० बिलियन डलरको लगानी हुनेछ । जसले इयु लाई रुसी उर्जाबाट स्वतन्त्र हुन सहयोग गर्नेछ । विमान र विमान पार्ट्स, केही रसायन, र केही कृषिजन्य उत्पादनमा शुल्क नलगाइने सम्झौतामा भनिएको छ ।
इस्पात र एलुमिनियममा ट्रम्पले लगाएको ५० प्रतिशत शुल्क भने यथावत् रहनेछ। फन डर लायनले ट्रम्पलाई “कठोर तर सम्झौता गर्न सक्ने नेता” भन्दै व्यक्तिगत रुपमा धन्यवाद दिएकी छन ।