पोष्टमार्टम गर्ने क्रममा अस्पतालका कर्मचारीबाट मृतकको गहना चोरी
प्रकाशित मिति : कार्तिक ११, २०७६ सोमबार
भरतपुर अस्पतालमा पोष्टमार्टमका लागि ल्याएको मृतकको शरिरबाट गहना चोरी भएको जनाइएको छ । पोखरीमा डुबेर मृत्यु भएकी एक महिलाको शरिरमा रहेको सुनको सिक्रि र औंठी अस्पतालका कर्मचारीले शुक्रबार चोरी गरेको जनाएको छ ।
अस्पतालमा पोष्मार्टममा काम गर्ने कर्मचारीहरु देवआनन्द राई र पूर्ण विकले चोरी गरेको प्रहरीको दावी छ । पोष्टमार्टम गर्नुअघि मृतकको शरिरमा गहना नदेखेपछि आफन्तले प्रहरीसँग सोधपुछ गरेका थिए । त्यसपछि अनुसन्धान गर्ने क्रममा उनीहरुकै साथबाट गहना भेटिएको प्रहरीको भनाई छ ।
चोरीको आरोपमा अस्पतालका दुई कर्मचारीलाई प्रहरीले कुटपिट गरेको भन्दै उजुरी परेको छ । भरतपुर अस्पतालमा खटिएका हवल्दार जमिर अलि शेखले कुटपिट गर्दा हात भाँचिएको उनीहरुको भनाई छ ।
प्रहरीले भने गहना हराएपछि सोधपुछ गर्ने क्रममा दुवै पक्षबीच सामान्य हातपात भएको र भाग्न खोज्ने क्रममा विकको हात भाँच्चिएको जनाएको छ ।
हातपातको विषयमा हवल्दार राईमाथि छानबिन भइरहेको तर भाग्ने क्रममा नै विक घाइते भएको डिएसपी कोइरालाले बताए । चोरीको विषयमा सोधपुछको क्रममा दुई पक्षबीच विवाद भएको थियो ।