Follow @khasokhasmag

न्युयोर्कमा कागजपत्रविहिनलाई अध्यागमनको त्रास देखाए साढे २ लाख डलरसम्म जरिवाना


प्रकाशित मिति : आश्विन १३, २०७६ सोमबार

न्युयोर्क सिटीमा कुनै व्यक्तिले कागजपत्रविहिनलाई अध्यागमनको त्रास देखाएमा वा अध्यागमन अधिकारीहरुलाई फोन गरेर जानकारी दिने भन्दै धम्की दिएमा धम्की दिने व्यक्तिलाई साढे २ लाख डलरसम्म जरिवाना हुने भएको छ । साथै गैरकानुनी एलियन शब्द प्रयोग गर्नमा समेत न्युयोर्क सिटीमा प्रतिबन्ध लगाइएको छ ।

न्युयोर्क सिटीको मानवअधिकार आयोगले २९ पेज लामो निर्देशिका जारी गर्दै कागजपत्रविहिनलाई ‘इलिगल एलियन’ शब्द प्रयोग गर्नमा प्रतिबन्ध लगाएको छ । कागजपत्रविहिनलाई होच्याउनका लागि गैरकानुनी शब्द प्रयोग हुदै आएकोमा अब त्यस्तो शब्द प्रयोग गर्नेलाई विभेद र घृणाको अपराध गरेको ठहर गर्दै सजाय हुने जनाइएको छ ।

निर्देशिकामा यस्ता घटनाका केही उदाहरण समेत दिइएको छ । एउटा भारतीय परिवारले सांग्ला भेटिएको बारे घरवेटीलाई बताउँदा घरवेटीले सांग्लाको सामना गरेर नबसे अध्यागमन अधिकारीलाई फोन गरेर देशनिकाला गराउने भन्दै धम्की दिएको र दुईजना थाईहरु स्टोरमा आफ्नोभाषा बोल्दा स्टोरको मालिकले उनीहरुलाई अँग्रेजीमा कुरा गर्न वा आफ्नो देश फर्कन भनेको जस्ता उदाहरणहरु निर्देशिकामा समेटिएको छ ।

न्युयोर्क सिटी सरकारले न्युयोर्क सिटीमा घृणाका लागि कुनै स्थान नरहेको भन्दै भाषाका आधारमा होच्याउन वा अँग्रेजी राम्रो नबोलेका कारण विभेद गर्न र हेप्नमा प्रतिबन्ध लगाएको छ । अब कोही व्यक्तिले अँग्रेजी राम्रो नबोलेका कारण वा आफ्नो भाषा बोलेका कारण होच्याउनेमाथि पनि मोटो रकम जरिवाना हुनसक्नेछ ।

यसैबीच मेयर कार्यालयको अध्यागमन मामलाले कागजपत्रविहिनहरुलाई सघाउन १ मिलियन डलरको घोषणा गरेको छ । देशनिकालाको सामना गरिरहेका कागजपत्रविहिनहरुलाई कानुनी सहायता उपलब्ध गराउनका लागि यो रकमको घोषणा गरिएको हो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com