आवेदकमध्ये कति नेपालीको भिजिटर भिसा अस्वीकृत ?
प्रकाशित मिति : भाद्र १२, २०७६ बिहीबार
कैयन नेपालीहरुले आफ्नो अमेरिकाको भिजिटर भिसा अस्वीकृत भएको गुनासो गर्दै आएका छन् । तर आवेदकमध्ये कति नेपालीको भिजिटर भिसा अस्वीकृत हुन्छ ? यसबारेको तथ्यांकले तपाईलाई आश्चर्यचकित पार्नसक्छ ।
पछिल्लो तथ्यांक अनुशार अमेरिकाको बी श्रेणीको भिजिटर भिसाका आवेदक नेपालीहरुमध्ये झण्डै आधाले भिसा प्राप्त गर्दै आएका छन् । आर्थिक बर्ष सन् २०१८ को तथ्यांक अनुशार कुल आवेदकमध्ये ४८ दशमलव ५ प्रतिशत नेपालीहरुले अमेरिकाको भिजिटर भिसा प्राप्त गरेका छन् ।
अमेरिकी विदेशमन्त्रालयको तथ्यांक अनुशार आर्थिक बर्ष २०१८ मा कुल आवेदकमध्ये ५१ दशमलव ५ प्रतिशत नेपालीहरुको भिजिटर भिसा अस्वीकृत भएको छ । सबैभन्दा धेरै भिजिटर भिसा अस्वीकृत हुनेमा नेपाल ४५ औं नम्बरमा छ ।
नेपालीहरुको तुलनामा भुटानीहरुको भिजिटर भिसा धेरै प्रतिशत अस्वीकृत भएको छ । तर पाकिस्तानी र बंगालादेशीको भिजिटर भिसा अस्वीकृत दर नेपालीको भन्दा कम रहेको छ । विश्वमा सबैभन्दा धेरै भिजिटर भिसा अस्वीकृत हुनेमा सोमालिया र इरान रहेका छन् । २०१८ मा जम्मा ३८ सोमालीहरुलाई भिजिटर भिसा प्रदान गरिएको थियो ।
अमेरिकामा विश्वका ३८ देशका नागरिकहरुभने भिसा वेभर कार्यक्रम अन्तरगत विद्युतीय प्रवेश अनुमति लिएर अमेरिकाको भ्रमण गर्न सक्छन् । जसमा धेरैजसो युरोप र अमेरिकाका धनी देशहरु रहेका छन् ।
आर्थिक बर्ष २०१८ मा १६ हजार १ सय ७० जना नेपालीहरुले बी श्रेणीको भिसा प्राप्त गरेका थिए । जसमध्ये बी वान बी टु भिसा प्राप्त गर्नेहरु १६ हजार १ सय १५ जना रहेका थिए ।