जिप दुर्घटना हुँदा एकजनाको मृत्यु, छ जना घाइते
प्रकाशित मिति : फाल्गुन २१, २०७४ सोमबार
फागुन २१, बैतडी । गोकुलेश्वर–गन्ना सडकखन्डअन्तर्गत् बैतडीको डिलाशैनीमा सोमबार एक जिप दुर्घटना हुँदा एकजनाको मृत्यु भएको छ ।
मृत्यु हुनेमा दार्चुला, मार्मा–३ का ३६ वर्षीय कृष्णसिंह विष्ट रहेका जिल्ला प्रहरी कार्यालय बैतडीका निमित्त प्रहरी प्रमुख प्रहरी निरीक्षक कमल विष्टले जानकारी दिए ।
दुर्घटनामा अरु ६ जना घाइते भएका छन् । गम्भीर घाइते एकजनाको परिचय खुल्न सकेको छैन ।
अरु घाइते हुनेहरुमा दार्चुला, मार्मा–६ का अकवर महरा, गोमती महरा, गीता महरा, भारतीय नागरिक मेरमान सिंह र सुर्वण सिंह रहेका छन् । घाइतेको गोकुलेश्वर अस्पतालमा उपचार भइरहेको छ ।
दार्चुलाको लटिनाथबाट गोकुलेश्वरका लागि छुटेको म१ज २३३ नम्बरको जिप बैतडीको डिलासैनी गाउँपालिका–३, झर्नामा सोमबार साँझ साढे ५ बजेतिर दुर्घटनामा परेको हो ।
जिप दुर्घटनाको कारण खुल्न सकेको छैन । चालक दीपक विष्ट फरार रहेका छन् ।
जिप सडकबाट करिब ५०० मिटर तल चमेलिया नदीमा खसेको प्रहरीले जनाएको छ ।
