Follow @khasokhasmag

स्थानीय तहको बजेट : सडक निर्माणमै ५० करोड


प्रकाशित मिति : फाल्गुन १६, २०७४ बुधबार

 

 

फागुन १६, पाल्पा । पाल्पाका आठओटा स्थानीय निकायले विकासको सडकलाई प्राथमिकतामा राखेर कार्यान्वयन गरेका छन् । पहाडी क्षेत्र र भौगोलिक विकटता रहेका ग्रामीण बस्तीमा यातायातको सहज पहुँच पुर्‍याउन स्थानीय सरकारले भौतिक पूर्वाधार निर्माणलाई प्राथमिकतामा राखेका हुन् । जिल्लाका स्थानीय निकायमा जनप्रतिनिधि निर्वाचित भएपछि सडक स्तरोन्नतिमा नयाँ ट्र्याक खोल्न धेरै बजेट विनियोजन गरिएको सम्बन्धित गाउँपालिकाका अध्यक्षहरूले बताएका छन् ।

गाउँमा उत्पादित कृषिउपज बजारसम्म पुर्‍याउन र सहज आवतजावतका लागि पनि सडकलाई प्राथमिकतामा राखेर बजेट विनियोजन गरिएको माथागढी गाउँपालिकाका अध्यक्ष सन्तोष थापाले बताए । सडकको ट्र्याक खोलेर स्तरोन्नति गर्न गाउँपालिकाले मात्र नभई वडा कार्यालयले समेत अग्रसरता लिएको रम्भा गाउँपालिकाका अध्यक्ष विष्णु भण्डारीको भनाइ छ । सडकका लागि वडाको बजेटले मात्र नभ्याउने भएकोले गाउँपालिकाले ३ करोड ६ लाख ३५ हजार विनियोजन गरेको पूर्वखोला गाउँपालिकाका अध्यक्ष नुनबहादुर थापाले जानकारी दिए ।

विगतमा कम बजेटले सडक बनाउँदा रकम अपुग भएकोले यसपटक सबैले सडकमा बढी बजेटको व्यवस्था गर्न माग गरेको रिब्दीकोट गाउँपालिकाका अध्यक्ष नारायण जिसीले बताए । उनका अनुसार गाउँपालिकाले सडकका लागि २ करोड रुपैयाँभन्दा बढी रकम छुट्ट्याएको छ ।

जिल्लाका ग्रामीण क्षेत्रमा पुराना र अधुरा सडक छन् । त्यसैमाथि नयाँ योजना धेरै छन् । त्यसैगरी नयाँ नियमअनुसार बनेको मापदण्डअनुसार सडकको स्तरोन्नति गर्नुपर्छ । धेरै योजना थोरै प्राविधिक अभावको कारण समयमै सम्पन्न गर्न कठिन हुने गरेको छ ।

जिल्ला विकास समितिले तीनओटा मुख्य सडक बनाएर स्तरोन्नतिसमेत गरिसकेको छ । यिनै सडकलाई गाउँबस्तीसम्म जोड्न स्थानीय तहले यस वर्ष ५० करोड रुपैयाँभन्दा बढी रकम खर्चिएका छन् ।

पछिल्लो समयमा ट्र्याक खोलिएका सडकमा वर्षायाम शुरू हुनासाथ सवारीसाधन ठप्प हुने गर्छन् । तिनै सडकमा बाह्रै महीना सवारी सञ्चालन गर्न सकिनेगरी स्तरोन्नति भएको नैनादेवी गाउँपालिका अध्यक्ष रामबहादुर कार्कीले बताए ।

नापजाँच नभएको सडकमा बजेट विनियोजन
पूर्वाधार निर्माणका क्रममा प्राविधिकले नापजाँच गरेर त्यसैको आधारमा रकम विनियोजन गर्नुपर्ने हो । तर, प्राविधिकको नापजाँचविनै सडक निर्माणका लागि धेरै बजेट विनियोजन भएका छन् । यसले कार्यान्वयनमा समस्या परेको प्राविधिकको भनाइ छ । केही गाउँपालिकाका अध्यक्षले सडक निर्माणका योजनामध्ये ठूला योजना आफूखुशी सञ्चालन गरेका छन् ।

एक्स्याभेटरको मात्र प्रयोग
सडक निर्माणको क्रममा मानवीय श्रमको विकल्पमा एक्स्याभेटरको मात्र प्रयोग भएको छ । गाउँपालिकाका अध्यक्ष, वडा अध्यक्षहरू नै हेभी इक्वीपमेण्टको व्यवसायमा संलग्न छन् । उनीहरूले आफूअनुकूलको उपभोक्ता समिति निर्माण गरेर आफ्नै साधन प्रयोग गरिरहेका छन् । आफ्ना गाउँपालिकामा सूचीकृत नभएका हेभी इक्वीपमेण्ट सञ्चालनमा रोक लगाएर ‘सिण्डिकेट’समेत कायम गरेका छन् ।

 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com