१० युवती विमानस्थलबाट पक्राउ
प्रकाशित मिति : फाल्गुन ७, २०७४ सोमबार
–महिला खबर–
काठमाडौ । त्रिभुवन अन्तर्राष्ट्रिय विमानस्थलबाट नक्कली भीसा प्रयोग गरी कुवेत जान लागेका १० युवतीलाई पक्राउ गरिएको छ । मानव तस्करीको आशंकामा उनीहरुलाई पक्राउ गरी अध्यागमन विभागले कारबाही अघि बढाएको हो । यही फागुन १ गते राति फ्लाई दुबईको एयरलाइलन्स मार्फत दुबई हुँदै कुवेत जान लागेकाहरु पक्राउ परेका प्रहरीले बताएको छ ।
उनीहरुको श्रम स्वीकृति अनुसारको भीसा नभएपछि उनीहरुलाई पक्राउ गरिएको अध्यागमन कार्यालय विमानस्थका प्रमुख होमनाथ थपलियाले जानकारी दिए ।
पक्राउ पर्नेहरुमा कपिलवस्तुकी शान्ता सुनुवार, चितवनकी कुमारी स्याङ्तान, रोल्पाकी हस्तकुमारी पुन, सिन्धुलीकी जानुकाकुमारी स्याङ्तान, मकवानपुरकी फूलमाया ब्लोन, मोरङकी पवित्रा विक, मकवानपुरकी हरिमाया मोक्तान, उदयपुरकी नानु सार्की, रसुवाकी टीकामाया तामाङ र सिन्धुपाल्चोककी विष्णुमाया लामा रहेका छन् ।
महिलाहरुलाई अध्यागमन विभागमा थुनामा राखी कारबाही अघि बढाइएको छ । उनीहरुको साथबाट एउटा नक्कली र अर्काे सक्कली भीसा फेला परेको थियो ।
दलालहरुले वैदेशिक रोजगारीका नाममा उनीहरुलाई बेच्न लैजान खोजेको हुनसक्ने आशंका गरिएको छ ।
यसैबीच भारतको बाटो हुँदै ओमान पुगेका तीन युवतीलाई आइतबार नेपाल फर्काइएको छ । दलालको पछि लागेर ओमान पुगेका उनीहरु त्यहाँ अलपत्र परेका थिए । उनीहरुलाई त्यहाँको दूतावासले नेपाल फर्काएको हो ।
