पार्टी अध्यक्ष र प्रधानमन्त्री आलोपालोको सहमति : दाहाल

सिन्धुलीको कपिलाकोटमा कृषि संकायतर्फको मरिण प्राकृतिक स्रोत व्यवस्थापन क्याम्पसको भवन शिलान्यास तथा बीएस्सी एजीतर्फको चार वर्षे कक्षाको बिहीबार उद्घाटन गर्दै अध्यक्ष दाहालले पार्टी तथा सरकार आलोपालोको सहमतिपछि केपी ओलीको नेतृत्वमा सरकार बनेको दाबी गरे । सरकार आलोपालो र पार्टी पनि आलोपालो पद्धतिबाटै सञ्चालन हुने अध्यक्ष दाहालको भनाइ थियो ।

पार्टी एकीकरणपछि मात्रै माओवादी केन्द्रका मन्त्रीहरु सरकार जाने उनले खुलाए । उनले पार्टी अध्यक्ष पहिला को बन्ने भन्ने खुलाएनन् । ‘अब नेतृत्वको समस्या रहेन’, उनले भने,‘महाधिवेशन नहुन्जेल आलोपालोमै बुधबार सहमति भइसकेको छ ।’

दरबन्दी समस्या रहेको कृषि संकायमा सुनाएपछि अध्यक्ष दाहालले ओलीले शपथ ग्रहण गरेलगत्तै तात्तातै त्यसको व्यवस्थापन गर्न अनुरोध गर्ने बताएका थिए । हेलिकप्टरबाट आएका उनले अनुसन्धानमूलक कार्यमा सरकार उदासिन हुने गरेको र अबका दिनमा त्यस्तो नहुने बताए । चार वर्षे बीएस्सी एजीको कक्षाको उद्घाटनमा अध्यक्ष दाहालले शिक्षाको नीतिमा आमुल परिवर्तन गर्दै व्यावसायिक र प्राविधिक शिक्षालाई अगाडि बढाउनु पर्ने खाँचो औल्याए ।

शिक्षालाई उत्पादनमूलक बनाइ जनजीवनसँग जोड्न अध्यक्ष दाहालको आग्रह थियो । कृषि तमथा वन विज्ञान विश्वविद्यालयका उपकुलपति ईश्वरी ढकालले प्रविधिको विकास गर्न अनुसन्धान हुनुपर्ने तर न्यून वजेटका कारण समस्या उत्पन्न भएको बताएका छन् । चार हजार दुइ सयले कृषि अध्ययन गर्नका लागि आवेदन दिएकोमा कर्मचारी दरबन्दी अभावका कारण देशभरमा २६५ मात्रले कृषि संकायमा भर्ना पाएको उनको भनाइ थियो ।

शिक्षाविद् सुरेशराज शर्माले प्राविधिक तथा व्यावसायिक शिक्षाले मात्र मुलुकको समृद्धि सम्भव भएकाले पोलिटेक्निकल विश्वविद्यालय स्थापना हुनु पर्नेमा जोड दिए । त्यस्तै अर्का शिक्षाविद् विद्यानाथ कोइरालाले विद्यालय तहदेखि नै प्राविधिक शिक्षामा सरकारको ध्यान जानुपर्ने बताए ।

मरिणगाउँपालिकामा रहेको कपिलाकोट माविको भवनमा रहेको कृषि संकाय जग्गा व्यवस्थापन भए पनि भवन छैन । सदरमुकामबाट २७ किलोमिटर दूरीमा रहेको कपिलाकोटमा विद्यार्थीहरु होस्टेल नभएकाले डेरा लिएर अध्ययन गर्नेछन् ।