अतिरिक्त शुल्क प्रणालीको प्रभाव न्यूयोर्कमा देखिन थाल्यो, सिटीमा ट्राफिक जाम कम
प्रकाशित मिति : पुस २९, २०८१ सोमबार
अमेरिकाको न्यूयोर्क शहरमा ५ जनवरीदेखि लागु भएको सवारी साधनलाई लक्षित अतिरिक्त शुल्क योजनापछि ट्राफिक जाममा उल्लेखनीय कमी आएको देखिएको छ ।
मेट्रोपोलिटन ट्रान्सपोर्टेशन अथोरिटी (MTA) का अनुसार, सोमवारदेखि शुक्रबारसम्म २ लाख ७३ हजार कम सवारी साधनहरू केन्द्रीय व्यापार क्षेत्रमा प्रवेश गरे ।
यसले जनवरीको सामान्य हप्ताको तुलनामा ट्राफिक ७.५५ प्रतिशतले घटेको देखाएको छ ।
अमेरिकामा पहिलो पटक लागु गरिएको यस कन्जेसन शुल्कले सवारी चालकहरूलाई अधिकतम ९ डलर प्रति दिनसम्म शुल्क लगाउँछ । अन्य सवारी साधनका लागि फरक दर तोकिएको छ ।
कन्जेसन क्षेत्रले सेंट्रल पार्कको दक्षिणतर्फको क्षेत्रलाई समेट्छ । जसमा प्रसिद्ध स्थलहरू जस्तै एम्पायर स्टेट बिल्डिङ, टाइम्स स्क्वायर, र वाल स्ट्रिट आसपासको वित्तीय क्षेत्र छन् ।
सुरुवाती तथ्यांकले न्यूयोर्कवासीहरूले ट्राफिक कम भएको छ, सडकहरू सुरक्षित महसुस भइरहेका छन्, र बसहरू छिटो चलिरहेका छन् (MTA) का प्रमुख जानो लिबरले भने ।
सवारी चालकहरूले समय बचत गरिरहेका छन् भने स्थानीय र एक्सप्रेस बसहरू विशेषगरी बिहानको समयमा छिटो चलिरहेका छन्, MTA ले आफ्नो सामाजिक सञ्जाल X मा पोस्ट गरेको छ ।
यस योजनाको उद्देश्य न्यूयोर्कको ट्राफिक समस्यालाई कम गर्नु र सार्वजनिक यातायात प्रणालीका लागि अर्बौं राजस्व संकलन गर्नु हो ।
धेरै चालकहरूलाई व्यस्त समयमा अतिरिक्त शुल्क तिर्नुपर्ने क्षेत्रमा प्रवेश गर्न प्रति दिन ९ डलर शुल्क लाग्छ । तर अन्य समयमा २.२५ डलर मात्रै तिरे पुग्छ ।
सानो ट्रक र गैर आवश्यक बसहरूले व्यस्त समयमा १४.४० डलर तथा ठूलो ट्रक र पर्यटक बसहरूले २१.६० डलर अतिरिक्त शुल्क तिर्नुपर्नेछ ।
यस योजनालाई धेरैले स्वागत गरेका छन् । तर केहीले यसको आलोचना पनि गरेका छन्। राष्ट्रपतिमा पुनः निर्वाचित डोनाल्ड ट्रम्पले भने यो योजनाको कडा बिरोध गरिरहनु भएको छ ।
ट्रम्पले यस महिनामा सत्तामा फर्केपछि यस योजनालाई खारेज गर्ने प्रतिबद्धता जनाएका छन् । गत वर्ष, ट्राफिक डाटा विश्लेषण कम्पनी INRIX का अनुसार, न्यूयोर्क सिटी लगातार दोस्रो पटक विश्वकै सबैभन्दा ट्राफिक प्रभावित शहरी क्षेत्र घोषित भएको थियो ।