प्रहरीले कसरी उठायो ४ अर्ब राजस्व ? अझै बढाउला त सकृयता !


प्रकाशित मिति : चैत्र १९, २०८० सोमबार

नेपाल प्रहरीले ४ अर्ब ३ करोड ४४ लाख ९६ हजार बराबरको राजस्व सङ्कलन गरेको छ । उक्त राजस्व चोरी, पैठारी तथा अवैध सुनचाँदी, मालसामान, नदीजन्य पदार्थ, अवैध काठ बरामद, अवैध मुद्रा, हुन्डी कारोबार, ट्राफिक जरिवाना, फैसला कार्यान्वयनलगायत शीर्षकबाट सङ्कलन भएको हो ।

संलग्न ७ हजार ६ सय ७९ जनालाई प्रहरीले कानुनी दायरामा ल्याई उक्त राजस्व सङ्कलन गरेको केन्द्रीय प्रहरी प्रवक्ता एवं प्रहरी नायब महानिरीक्षक भीमप्रसाद ढकालले जानकारी दिनुभयो ।

उहाँका अनुसार राज्यको कानुन कार्यान्वयनका क्रममा फैसला कार्यान्वयनबाट पक्राउ, अवैध भन्सार छली, ट्राफिक कारबाहीलगायत कार्यबाट नेपाल प्रहरीले वार्षिक रुपमा ठूलो परिमाणमा राजस्व सङ्कलन गर्दै आएको छ । लुकाईछिपाईकन भन्सार छली गर्ने, अवैध रुपले सामान भित्र्याउनेजस्ता राजस्व चुहावटका क्षेत्रमा देखिएका समस्या भएको प्रवक्ता ढकालले बताउनुभयो ।

सङ्कलित राजस्वमध्ये अवैध मालसमान बरामदबाट १ अर्ब ३६ करोड ४४ लाख ३ हजार दुई सय ५६, ट्राफिक जरिवानाबाट १ अर्ब १० करोड ३६ लाख ४५ हजार ३ सय ५४ र फैसला कार्यान्वयनबाट १ अर्ब २ करोड ७८ लाख ३ हजार ५ सय ४३ सङ्कलन भएको प्रवक्ता ढकालले जानकारी दिनुभयो ।

चालु आर्थिक वर्षमा हालसम्म सङ्कलित राजस्व तथ्याङ्कको विश्लेषण गर्दा राजस्व सङ्कलन ६ अर्ब ५ करोड १७ लाख ४४ हजार हुने प्रक्षेपण गरिएको छ जुन गत आर्थिक वर्षको तुलनामा ३५ दशमलव १७ प्रतिशतले बढी हो । चालु आर्थिक वर्षको फागुन मसान्तसम्म ८ महिनाको राजस्व सङ्कलन गत आर्थिक वर्षको ८ महिनाको तुलनामा ५० दशमलव २८ प्रतिशतले राजस्व सङ्कलनमा वृद्धि भएको प्रहरीको तत्थ्याङ्कले देखाएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com