ठूला नेता भेटघाटको रहस्य बारे यस्तो भन्छन्,माओवादी केन्द्रका केन्द्रीय सदस्य
प्रकाशित मिति : असार २०, २०७९ सोमबार
आइतबार तत्कालिन नेकपाका बहुमत सचिवालय सदस्यहरूबीच भेटवार्ता भएपछि फेरी बाम गठबन्धनको चर्चा सुरु भएको छ । पाँच दलीय गठबन्धनमा आवद्ध दलका चार जना नेताहरु र कम्युनिष्ट एकता गराउन चाहेका बामदेव गौतमबीचको भेटले कांग्रेस र एमाले दुवै दललाई शसंकित बनाएको छ ।
संघ र प्रदेशको निर्वाचनअघि नयाँ गठबन्धन बन्नेमा सबै दल एकअर्काप्रति सशंकित भइरहेका छन् । यस्तो अवस्थामा नेकपाकालिन ५ जना शीर्ष नेताको भेटले शंकामा बल पुर्याएको छ ।
अहिलेको गठबन्धन तोडेर कम्युनिष्टहरु जुट्ने हुन कि भन्ने चिन्तामा कांग्रेस छ भने आफूविरुद्ध सबै मिल्ने हुने कि भन्ने त्रासमा एमाले अध्यक्ष केपी ओली छन् । यस्तो अवस्थामा आइतबारको भेटलाई माओवादीले भने राजनीतिक सम्भावना जे पनि हुनसक्ने रुपमा अथ्र्याएको छ । तर पहिलो प्राथमिकता ओली प्रवृत्ति विरुद्धको मोर्चाबन्दी हुने माओवादीका नेता विशाल खड्का बताउँछन् ।
उनी भन्छन्,राजनीतिमा सबै सम्भावनाहरुको ढोका खुल्ला रहन्छ । तर कम्युनिष्टको नाममा केपी ओली प्रवृत्ति हाबी भयो, यस्तो निरंकूश राजा बन्ने प्रयत्नविरुद्धको मोर्चाबन्दी पनि हो ।’
नेकपा एमाले र नेकपा माओवादी केन्द्र मिलेर बनेको तत्कालीन नेकपाका बहुमत सचिवालय सदस्यहरूबीच आइतबार साँझ ललितपुर हातिबनमा भेटवार्ता भएको थियो ।
भेटमा माओवादी केन्द्रका अध्यक्ष प्रचण्ड, नारायणकाजी श्रेष्ठ, एकीकृत समाजवादीका अध्यक्ष माधव नेपाल, झलनाथ खनाल र नेकपा एकता राष्ट्रिय अभियानका संयोजक वामदेव गौतम सहभागी थिए ।-एनएनबी